من هم "ناس دوز" لهذا الأسبوع؟

آلاء الديك (22 عاماً)

"درست صحافة وإعلام. الكل بحكيلي هاد التخصص بشبهني وبشبه شخصيتي، وأنا فعلاًً حبيت التخصص. سمحلي أطلع وأشوف ناس وأشخاص مختلفين عنا وكمان سمحلي أحقق أحلامي. عمري 22 سنة وحققت إلى آلان 22 حلماً، منهم أحلام يمكن يعتبروها الناس شي سخيف، ومنها رح يعتبروها شي كبير، بس المهم أنا حققت كل حلم كتبته على الورقة وأنا بصف سابع. من وأنا صغيرة حلمي أروح الأندلس، كان في رحلة منظمتها جامعتي (جامعة النجاح الوطنية) وانقبلت من قبل لجنة العلاقات العامة بالجامعة. كانت رحلة رائعة علمتني وغيرتني كتير على الصعيد الشخصي والعملي. وأنا على أعتاب التخرج صديقتي حكتلي  في منحة دراسة أسبوعين ببيروت. قدمت وجربت حظي وبعتت السي في وردوا علي الجامعة اللبنانية الأمريكية بإنهم بدهم يقابلوني سكايب، بعدها فتحت الايميل ولقيت رد قبول على طلب المنحة. طرت من الفرحة! طلعنا ع بيروت كان شي حلم وتحقق الحلم. وإحنا بالطيارة مرقنا عن دمشق. يا الله شو الغصة كانت كبيرة! وهيك حملت أكثر من رسالة بقلبي. وهلأ عم أدون تجربتي ببيروت وإسبانيا وعم أخطط لمخططات جديدة بما إني خريجة جديدة بس ما بشعر بفراغ أبدا".


نديم أبو شمس (23 عاماً)

"كنت حابب أدرس هندسة معمارية بس ما لحقت امتحان المستوى، فدخلت هندسة بناء لأنه من هواياتي الرسم والتخطيط. بطمح بعد ما أتخرج أني أسافر على أستراليا باعتبارها بلد المساحات الخضراء وفيها مجال أكمل دراسة وأشتغل بنفس الوقت".


أديب حسن (20 عاماً)

"بدرس هندسة مدنية. أكثر شي بحبه الرياضة وكرة القدم، وأحلى شي صار معي بالجامعة إني كنت مجمع بمادة 22 من 50، وكنت متأكد إني حاملها وبالآخر نجحت. فكانت D بطعم الـA".


علي ماجد (19 عاماً)

"دخلت تخصص الهندسة الميكانيكية لأنه عندي شغف بالميكانيا. بحب تخصصي وبتمنى أبدع فيه. أكتر موقف محرج صار معي في هذا الفصل لما دخلت محاضرة العربي وكان صرلي أسبوع مش حاضرها، اكتشفت إنه المكيف خربان فطلبت من الدكتور أشغله، وطبعا كان الكل بعرف إنه خربان إلا أنا. قمت حاولت وما اشتغل وهيك كل المدرج صار يضحك".


حسن عياد (83 عاماً)

"من 40 سنة وأنا بشتغل على بسطة. كل يوم ببيع شي، يوم ذرة ويوم خيار ويوم خوخ. ولادي وبناتي كلهم متزوجين. عايشين أنا ومرتي لحالنا. اشتغلت شغل كتير بحياتي، فاشتغلت مبيض نحاس وكوى ملابس ومزارع. ما بزبط إني أترك الشغل لأني إذا تركت بهبط وبمرض".

إعداد: أسماء حمد ومجد حسين
المحررة: سارة أبو الرب