دفنوا صاحبتي قدامي!

"اليوم دفنوا صاحبتي قدامي!
اللي صرلي صحبة معها ١٠ سنين وكنت متقاتلة معها قبل كم شهر على موضوع تافه...
صحيت على خبر وفاتها، ما صدقت فكرت البنات بمزحوا، وقعدت أحكيلهم بلا حكي فاضي.... ما كان فيها شي كيف ماتت بالله....
صاحبتنا صارت تحلفلي ولك والله ماتت! إجتها سكتة قلبية وماتت... وكانت تعيط ...
أنا شوي شوي بلشت أستوعب الموضوع، يعني عنجد بتحكي....
صرت أرن عليها، تلفونها برن وما حدا برد...
رنيت على أختها كمان ما ردت..
بهاللحظة أنا بلشت أنهار شوي شوي ...
وبلش شريط ذكريات صحبتي معها يمر من قدامي...
كيف كنا بالمدرسة مثل الخوات، كيف كنا نتقاتل ونتصالح بنفس اليوم...
صرت أشوف ضحكتها وكلامها قدامي...
ولما نجحنا بالتوجيهي ورحنا عالجامعة مع بعض...
كيف ضعنا بالمدينة؛ وما عرفنا نوصل الكراج...
تذكرت أكثر أكلة بتحبها...
صرت كل ما أتذكر إشي أعيط أكثر... وقلبي يوجعني أكثر...
وصلت للطوشة إلي صارت بيني وبينها قبل ٣ شهور، كيف يومها عجبنا على بعض، وكيف بعدها بطلت أحكي معها بالمرة؛ وحاولت مرة تصالحني وكبريائي ما خلاني أصالحها...
تذكرت لما رنتلي وحكتلي إنها تعبانة، قلتلها خلي إلي بعتيني مشانها تريحك... وكيف عنجد زعلتها وقتها
صرت أعيط بصوت أعلى وأرن عليها على أمل ترد، بعدها قررت أروح عندهم..

وصلت بيتهم لقيت الكل بعيط، أختها كانت بتصرخ ومنهارة وإمها قاعدة جنبها وماسكة إيدها، لما شفتها ما صدقت إنها ميتة، ركضت لعندها وقلتلها قومي ولي...