بنت بين خمسة شباب!

أنا بنت وحيدة بين 5 شباب، هالشعور كتير بشع، وأنا صغيرة كنت بشوف البنات بروحوا مع خواتهم من المدرسة وأنا يجي أخوي الكبير يروحني. وبمرحلة معينة كانوا صاحباتي وخواتهم يلبسوا من بعض وتيجي تحكيلي عن أختها وإنها تطاوشت معها وأنا أكون نفسي أحس بهالشعور، جد كان نفسي يكون عندي أخت أشاركها كل شي, كانت كل حياتي مقضيتها مع إخوتي الشباب وخالتي تضل تحكي لإمي: إبعديها عن إخوتها بكرا بتصير متل الحسن صبي! أصلا تصرفاتها زلامية صايرة..

إيش بتتوقعوا من بنت عايشة مع 5 شباب وهي أصغر وحدة فيهم؟ بعد ما فتت الجامعة طلبني شب من أهلي، يومها شفت إخوتي مجتمعين وكل واحد فيهم ببحث عن شغلة!
اطلعت فيهم وحكتلهم إيش في؟ قالولي: هاد الشب دارس بهالجامعة، بشتغل هناك، مصاحب مرتين بحياته، إمه متوفية، أبوه بشتغل مقاول، خواتو 2 متزوجات وقائمة طويلة. أنا ضحكت وحكتلهم مالكم؟ مش مركنين عقرارات اختكم؟

كل واحد فيكم عامل تحقيق جنائي..
بصوت واحد حكولي: يعني إنتي موافقة؟؟
حكتلهم: اه موافقة الشب محترم ورايدني بالحلال.. 
أصغر واحد بإخوتي لقيته سكت ودمع..
الوسطاني صار يحكيلي: لساتك صغيرة... 
الكبير إجا حضني وقلي مبروك يختي... 
والـ2 الباقيين ضلو ساكتين..

بس إجو أهل الشب يطلبوني كنت خايفة من هاللحظة وأكون وحيدة فيها، بس كل واحد فيهم كان يعمل إشي، أخوي يحكيلي: هاد اللون حلو عليك والصغير بزبط بالصالون وواحد راح جبلي كندرة مناسبة، لإنه تبعتي انكسر كعبها، وواحد فيهم كان بعطرني..
وكلهم كانوا صافنين فيي ويستنوا أطلع أضيف القهوة وبتخوتو.. ويحكولي: العريس شكلو منيح..
بس فتت وطلعت، كانوا مصفصفين عالكنبايات وبرموا بالعريس من تحت لفوق. للحظة حسيت إنه هو فار وقع بين 5 قطط مش طبيعين كانوا.. فرطت ضحك عليهم..

مرقت الأيام وإجا يوم العرس، اليوم الي رح أترك فيه بيت أهلي.. صاحباتي كانوا كلهم حولي لإني وحيدة وما عندي أخت، بس الأحلى إنه إخوتي الـ5 كانوا بكل مكان بروحله! مثل صف العسكر معجوقين وعاجقتهم، الفستان هيك حلو، طيب القاعة؟ الأغاني زابطين، كل شي حضرنا مع بعض، حتى لما رحت أرتب بيتي كانوا معي!
بتذكر مرة دخل علي أخوي الصغير وكنت أعيط.. بحكيلي: مالك؟ بحكيله: مش لو عندي أخت كان تدربت عالرقص معها... 
بعد شوي.. دخلوا عندي ماسكين سماعة كبيرة ومشغلين أغاني ويرقصوا.. أنا حششت عمنظرهم كيف بحكولي: يلا قومي ارقصي أبو الشباب معنا.. وأنا أضحك وأحكيلهم لا بستحي..

وكل واحد يعمل حاله مثل عريسي ويرقص شوي معي، لحتى صرت أعرف أرقص.
بس طلعت من الصالون إجو قبل عريسي يشوفوني، كان الصغير لساته بعيط!
قلتله: إيش في؟
قلي: كيف رح نعيش بدونك؟ مين رح يقردنا؟
حكتله: لا تخليني أعيط..
بس إجا العرس، دخلوا الـ5 معي هم وأبوي، أبوي كان ماسك بايدي وهم الـ5 ورا مثل صف السحيجة.. 
بس وصلت المنصة كانوا كلهم حوالي بصفقوا وأنا أرقص بالنص، وبعدها طلعوا..

طول العرس وأنا أتذكر طفولتي معهم، كيف كانت كل حركاتي متل الشباب، أتذكر كيف كنا نتقاتل عالألعاب والألوان ، وكيف لما كبرت صرت مسؤولة مثلهم!
اتذكر اسم "أخت الشبباب" ويخطروا ببالي إنه لو عندي خوات صح إشي حلو بس هدول أحلى بكتير..

بس إجا يخلص العرس، لقيتهم فايتين وجايبين دبدوب كبير وكل واحد حامل ورقة وكاتبلي فيها عبارة. بس بلشنا نسلم للتصوير أنا ما عيطت، بس كلهم صاروا يعيطوا ونا أواسي فيهم ... 
اطلعت فيهم وقلتلهم: أخت الشباب شو؟
حكولي: شب؟
حكتلهم ما رح أعيط لإنكم رح تضلوا سندي بكل مكان وزمان وأنا مع الشخص إلي عارف إنكم بضهري!
اطلعوا فيي وحكولي: بس إحنا رح نشتاقلك يختي..
حضنتهم مرة وحدة وصرت أحكيلهم: وأنا كتييير..

مين قال أخت الشباب بتكون شب؟ مين قال إنهم الأخوة مش أحن اشي بالدنيا؟ اخت الشباب بتكون على قد حالها لإنهم إخوتها مش شايفين غيرها وهي بتكون تتعلم منهم وخصوصاً إذا كانوا بخافوا الله ومناح..

زوجي لليوم ما بسترجي يزعلني بحرف، وكل ما نتمشكل بصير يمزح يحكيلي وراكي 5 يا حبيبتي بنسترجيش نزعلك!

الكاتبة: هديل قاسم

* هذا النص لا يعبر بالضرورة عن رأي دوز