أنا همام من نابلس وهذا حلمي..

"اسمي همام وعمري 26 سنة من نابلس

أخدت إكمال بمادة الأحياء وانصدمت لإنه عمري ما رسبت. عدت المادة ونجحت قبل ما أسجل بالجامعة اشتغلت بمطعم وحبيت شغلي كثير مع إني كان عمري بس 18 سنة. قدرت إني أسجل بالجامعة وأكمل شغل كنت أنزل على الجامعة الساعه 8 وبعدها من الساعة ٣ وأضل لساعه 12 ونص بالليل. والله لو أحكيلكم إني ما كنت أحس بالتعب يمكن ما تصدقوا!

كنت كتير مبسوط كيف أنا قادر أدرس وأشتغل ودايما معي مصاري وبشتري اللي بدي إياه وبدفع قسط الجامعة كمان.. خلال فترة دراستي بالجامعة تخصص علم نفس، تنقلت بخمس محلات كلها متخصصه بالأكل وتقديمه يعني اشتغلت على البيتزا وعلى السفرة وصرت معلم قررت باَخر فصل إني أبلش أشتغل لحالي.

كان في مستودع تحت البيت، نظفته ورتبته، والحجة اشترتلي فرن وفعلاً ربنا فتح علي وصرت أعمل معجنات بمحل لأبوي، وأحط المعجنات بكرتونه وأنزل الصبح قبل دوامي بالجامعة أبيع المكاتب والموظفين. وبعدين جبت بسكليت وحطيت عليه سلة وصرت أوزع بوقت أقل وفعلا اتطورت الحمد لله اليوم أنا عندي سيارة بمساعدة أبوي وبوزع لكل المحلات الكبيرة بنابلس.

ومن العمارات اللي كنت أبيعها معجنات كان فيها إذاعة راديو، اليوم أنا الي فيها برنامج اسمه سأصبح ما أريد، أحكي في قصص نجاح وتحفيز لكل الشباب وأهتم من الناحيه النفسيه كيف نعزز أفكارنا.

أنا حلمي إني أكبر أكثر وأكثر وأفتح أفرع بكل أنحاء فلسطين وإن شاء الله بعدها باجي على الأردن ومين عارف يمكن أصير عالمي إن شاء الله".

المصدر: طموح