والله خايفة أتخرج..

والله خايفة أتخرج.. لما كنت توجيهي كنت كتير متحمسة أجيب معدل.. وأتخرج.. وأصير جامعة.. وأعيش حياة أبداً ما بتشبه إلّي فعلاً مريت فيه.. لدرجة كان من أحد أحلامي إني بس أخلص توجيهي أنزل ع السوق أشتري كتيييييييير أواعي للجامعة. بس بالحقيقة إنك لما تخلص توجيهي، بتكبر بيوم وليلة.. حرفيا بتكبر فجأة.. خصوصاً إذا أجت ظروف حياتك مو مثل ما بدك.. والحقيقة إنو إنت اليوم بطلت طفل.. صدّق ولا بلاش إنو وإنت 18 وتوجيهي والله لساتك طفل.. والحقيقة إنو المسؤولية تضاعفت 3 أو 4 أضعافها.. والحقيقة إنو Friends For Ever راس مالهم جامعتين مختلفتين.. إلّا من رحم ربي.. والحقيقة إنك رح تحدد مستقبلك بتخصصك.. ادرس الإشي إلّي بتحبو عشان رح تبدع ورح تخترع شغل ورح تخترع مصاري و رح تتفوق ورح تتعب وإنت مبسوط ورح تتخوزق وبرضو مبسوط.. فلا تستهين بلحظة تقديم طلبات الموحد.. والحقيقة إنو بالمدرسة كل الصف بكره البنت المش شاطرة وبعرفها.. بس بالجامعة غريب كيف الشاطر بيحاول يخبي حالو.. ينعن بحبوش الخير لحدا.. بتحاول الوحدة تطلع حالها "حمارة" بأي طريقة. والحقيقة إنو ع قد ما كنت تحب لحظة جرس الفرصة.. رح تصير نفسها لحظة كاسة النسكافيه وبالك مرتاح.. وخصوصا ًبالصبح البارد.. والحقيقة إنك رح تشتاق لحالك.. يا الله شو رح تشتاق لحالك.. غريب آه.. و كيف تسألنيش.. والحقيقة إنك رح تحكي "يا ريت بس أرجع توجيهي وبديش إشي ثاني". بس برضو إنو الحقيقة إنك بتعرف شو بدك.. إزا مشيت صح.. والحقيقة إنك ممكن تلاقي صاحب عمرك فعلاً.. والحقيقة إنك بتبطل هبيلة وبتتحمل مسؤولية.. والحقيقة إنك بتصير بعين الناس بني آدم.. جامعي ويا نيالك.. والحقيقة إنو فعلاً نيالك ويسلم إيد وتراب أهلك إلّي لولاهم ما بتوصل.. والحقيقة إنو عيش كل لحظة بالجامعة لأنها رح تصير توجيهي بفترة من العمر.. والحقيقة إنك لسا ما كبرت كتير.. وإنو في مسؤولية لسا أكبر.. والحقيقة إنو جامعتك بال 4 سنين أو 5 أو 6 أو 7 رح تقضي فيها وقت يمكن أكتر من بيتك.. حيصير إلك مكان بتحب تقعد فيه.. وقاعة بتتفائل فيها.. ودكتور بيغير نظرتك للحياة مش ضروري للأسوء ممكن للأحلى.. والحقيقة إنك لازم تنبسط.. لأنو غيرك ما صحلهم إلّي إنت فيه.. أنا خايفة أتخرج.. وأرجع أكبر بيوم وليلة.. وأحكي "يا ريت بس لو أرجع سنة أولى".   الكاتبة: رغدة جناجرة المحرر: عبد الرحمن عثمان