عشان ما تنصدم بالجامعة،، نصائح للطلبة الجدد

"عشان ما تنصدم بالجامعة،، ما تستهين بدراستك وتفكر الجامعة ملاهي،، ووازن بين دراستك وحياة الجامعة. حياة الجامعة حلوة كثير، بس عشان كمان ما تنصدم خلي عندك صديق أو صديقين قراب والباقي يكونوا زملاء، وحتى لو شكلت مجموعة ما تغوص كثير بينهم، خلي حدود لكل اشي". "كون حذر باختيارك لأصدقائك خاصة أول سنة، خلي كل اشي حقل للتجارب، ومش ضروري أول ما تدخل الجامعة تحب، عيش حياة الجامعة بحرية وبعلاقات اجتماعية حلوة. عشان ما تنصدم بالجامعة، ادرس وما ترد على أصحابك بتطنيش المحاضرات. وعشان ما تنصدم، الجامعة ملانة بأشكال ألوان من الطلاب، كون قد حالك وواثق من نفسك". "الحكي بوجهك وورا ضهرك عليك اشي طبيعي، عشان هيك دير بالك باختيارك للأصدقاء وقسمهم: معارف، زملاء، شلة أصحاب، أصدقاء مقربين جداً. أصدقائك بالمدرسة ممكن يتغيروا وهاد اشي طبيعي لدخولك لمرحلة جديدة ومجتمع أوسع. وانت كمان رح تتغير و هاد مش خطأ، بس تغير للأفضل طبعاً. عشان ما تنصدم رح تخطئ بالجامعة لكن الأهم تتعلم من خطأك". "وعشان ما تنصدم، أنت رح تكون مسؤول عن حالك وأي تصرف انت مسؤول عنه. و تذكر انت قوي وعاقل وواعي وهاي مرحلة جديدة، وانت بترسمها وانت اللي بتقرر تكون سيد نفسك أو دنب للناس اللي حوليك. انت اللي بتقرر تكون ناجح وفاعل أو شفاف. بالتوفيق".   الكاتبة: اَمنة خندقجي المحررة: جلاء أبو عرب *هذا المقال لا يعبر بالضرورة عن رأي دوز