رناد جيطان: ما تتزوجي بكير!

ما تتزوجي بكير! عيشي حياتك مع أهلك، مع صاحباتك مع شلتك. حبّي. عيشي عمرك. جربي كل شيء. اغلطي. تعلمي. اطلعي مشاوير، غيري جو. تبهدلي من أهلك. فوتي جامعة، ادرسي تعلمي احملي مواد مش مشكلة. اخلقي ذكريات لهالمرحلة اللي رح تكون الأحلى بحياتك بغض النظر عن السلبيات اللي ممكن تواجهيها من الدراسة. الذكريات أساسها الأشخاص، خلي يكون إلك ذكريات مع ناس ممكن يكونوا أجمل شيء صار بحياتك وممكن يعلموكِ أهم دروس حياتك. اتخرجي وعيشي الفرحة اللي بتمنوها كتير ناس. اشتغلي واتعبي، طلعي راتبك الخاص فيكِ وحسي شوي بالعبء اللي حامله أبوك، هون ببلش حس المسؤولية عندك! بتكوني كبرتِ.. نضجتِ وعقلتِ.
بتهيألك أنه صار فيك تتحملي مسؤولية، بتتغير نظرتك لكثير أمور، تصرفاتك. تحرميش حالك من أي شيء بتتوقعي أنه بالمستقبل رح تندمي لأنك ما عملتيه قبل ما تتزوجي.
أنك تتزوجي بكير شيء ممتع وجميل بس أوله، بعدين بتبلش المشاكل، ببلش الندم، ببلش الغلط. الزواج شيء أكبر من كونه مجرد عالم تاني حلو، خاصة إذا كان مع الشخص اللي بتحبيه. الحياة الوردية اللي شايفتيها بالزواج خاصة المبكر هاي بس موجودة بالأفلام، ممكن تعيشيها أول فترة زواجك بس بعدين مع الأيام بتتلاشى. بتبلشي تشوفي اللي بعمرك أو بنات صاحباتك بالجامعة طالعين أو سهرانين أو نايمين عند بعض أو أو أو... بينما أنت لازم تجهزي لعزيمة بيت حماك عندك بالبيت لثاني يوم، أو لازم تسهري جنب ابنك اللي فش بينك وبينه 17 سنة إذا مش أقل، لأنه مريض، بينما صاحباتك عايشين عمرهم والأشياء الصح اللي المفروض تصير بهيك عمر.
الزواج هو أكبر مسؤولية ممكن يتحملها الفرد طول حياته. مش حياة وردية مثالية فش فيها مشاكل وكلها سعادة وراحة بال. أنت ليش لحتى تتحملي هيك مسؤولية بعمر الورد اللي أنت بتكوني فيه؟ وين ذكرياتك؟ وين صاحباتك؟ وين هبلك وجنونك؟ وين تجاربك بالحياة؟ وين اللي تعلمتيه من أخطائك؟ وين وين وين؟!.. الزواج عالم ثاني، عالم أوسع، عالم بطل يشملك أنت وأهلك، صار يشمل كمان زوجك وأهله. كبرت مسؤوليتك، كبرت واجباتك، كبرت مشاكلك، بس أنت بزواجك المبكر هاد كبرت بحالك كل شيء بس بطريقة غير طبيعية، زي النبتة اللي بعطوها هرمونات مشان تكبر قبل بوقتها.
هالنبتة مش دائما بتكون صحية لأنها ما كبرت بشكل طبيعي وأخذت وقتها، وهيك انت..! بس تشوفي حالك قادرة تتحملي مسؤولية حالك بدون ما تراجعي أمك أو أبوك أو تعتمدي عليهم، وتكوني متأكدة وواثقة من قرارك ومن قدرتك على تحمل هالعبء، وقادرة تتحملي مسؤولية شغلك وراتبك اللي هم لسه أبسط مسؤولية ممكن تتحمليها، وقتها تزوجي!

الكاتبة: رناد جيطان
المحررة: سارة أبو الرب
*هذا المقال لا يعبر بالضرورة عن رأي دوز