"على الفيسبوك بتحط صورة ذهب وبالمول بتوكل كف"

قاعدة على مواقع التواصل الاجتماعي بشوف في الأخبار وصور صاحباتي هني ومتجوزات، وكان عندي صديقة من أيام المدرسة كان الكل يتابع صفحتها على سناب شات وفيسبوك وانستغرام وغيرو، كانت تنشر صورها هي وزوجها وأولادها وشو جابلها زوجها ووين راحوا ووين إجو.

كنت بتفرج على آخر هدية جبلها إياها وكانت عبارة عن طقم ذهب، وقتها اطلعت على حالي، جوزي صار إلنا متجوزين 7 سنين ما عمرو جبلي أشي من أيام الخطوبة، وهي اتجوزت معي بس جوزها كثير بدللها وبجبلها شغلات، وقتها حسيت في حسرة في قلبي وحكيت الله يهنيها ويبعتلي، مش مثل زوجي النكد.

وقتها فات زوجي وحكالي قومي حطيلي أكل، حطيتلو أكل وقعدت أتفرج وزوجي يخرف فيي عن عملو وشو اشتغل، وأنا بس صافنة وأحكي في عقلي: كثر ما تخرفني مش راح تفيدني. وقتها حسيت في حيرة في قلبي، ليش زوجي مش زي زوجها؟ ليش ما يطلعني ويطششني ويجيبلي ذهب ويحبني مثل زوجها؟ وعندي ولدين مثل أولادها بس أولادها كل لبسهم ماركات وإشي مرتب وبتصور فيهم وتنزلهم وأنا والله ما بصورهم لأنو لبسهم ولا شي جنب لبس أولادها، وغير المدرسة الخصوصية يلي بدرس فيها أولادها مو مثل أولادي في مدرسة حكومية.

وكنت أوخد أولادي على الموال أطششهم بما أنو أبوهم بشتغل كثير ودائماً مشغول، بضل يحكيلي لازم أشتغل على شان أقدر أطعميكم في الحلال. وقتها نزلت على المول وولادي كانوا كثير مبسوطين يضحكوا ويلعبوا وأنا مبسوطة على فرحهم. 

ضربها كف

بس لفتني صوت عند الألعاب وكان زلمة بصيح على ولادوا وبحكيلهم شو يا ولاد بدكم اتطشوا وتنبسطوا؟ يلا انبسطوا. وكان يضرب فيهم وهمي يعيطوا. وقتها انمزع قلبي عليهم وحكيت وين أمهم؟ بس أمهم شكلها كانت في الحمام، أجت وصارت تحكيلو ما تضربهم لساتهم أطفال، فحكالها ما دخلك يا شرشوحة منتي ما اعرفتي المول غير لما اتزوجتك. هي صارت تبكي وتحكيلو وطي صوتك فضحتنا، فزوجها ضربها كف وحكالها احترمي حالك وراح وخلاها هي وولادها يبكوا.

وقتها كانت صدمتي إنها البنت صاحبتي يلي بعرفها على المواقع وبتنشر على النت كلشي، صفنت في حالي وحمدت الله، زوجي ما بضربني، زوجي ما بضرب الأولاد، زوجي بحبني، بحترمني، بتناقش معي. روحت على البيت وأنا مذهولة، فتحت الفيسبوك لقيتها ناشرة عليه: يسلمو حبيبي على هيك طشة في المول ومنزلة أكمن صورة، والكل يحكيلها تتهني.

على شو تتهنا وزوجها ضربها وأهانها قدام الكل! على شو تتهنا وهي مش مرتاحة معو؟ وإجا زوجي سلم علي أنا والأولاد وبلش يلعب معهم ويحكيلهم كيف كان يومكم في المول ويضحكوا وكان صوت ضحكتهم معبي البيت، وإجا خرفني عن شغلوا وشو عمل، وقتها عرفت إني عايشة في نعمة، زوجي بحبني ومحترم وبكسب رزقه في الحلال.

مش أي صورة بتنزل أو أي قصة بنسمعها يعني صح، وكنت رح أخرب حياتي منشان أنشر صورة يكون شكلها سعيد بس جواها والإحساس فيها ميت، ولا حب ولا سعادة، بس منشان المظاهر.

الكتابة: ديما نعيرات - 18 سنة - جنين
المحرر: عبد الرحمن عثمان