قررت أفسخ خطبتي!

"قررت أفسخ خطبتي!

هاد القرار إلي كان لازم أخدته من سنتين، من أول يوم تعرضت للإهانة منه، من أول موقف ورجاني فيه إنه ما بستاهل بنت مثلي، وكل مرة أروح أحكي لأهلي أخاف.. لإنه هو اختياري .. وكان حبيبي.. وأنا إلي أقنعتهم يوافقوا.. اَخر موقف صار ما قدرت أتحمله، خطبنا سنتين، وطول هالسنتين ما جبلي إلا هديتين بعيد ميلادي، كان يفوت دائماً علينا فاضي، أنا ما بدي شي منه بفهم وضعه، بس لو كيلو فواكه معه، يوجبني ويوجب أهلي ....

وغير هيك، منعني أحكي مع صاحباتي، صار يتحكم في بكل تفاصيل حياتي، هاي اللبسة مش زابطة، تحكيش مع ولاد خالك، تروحيش مع صحابتك .. كان كاتم عنفسي وشكاك كثير، كل هالشغلات حكيت بتتغير مع الوقت، يمكن هاي تربايته، وكلمة مطلقة مش قليلة، يعني أهلي ما رح يقبلوا أفسخ الخطبة وصاحباتي رح يشمتو فيي، وكانوا عماتي كل ما يجتمعو يقعدوا يحكوا عن البنات الي بفسخوا إنه ولا حدا بفضلهن، ويا دوب ختيار يواففق عليهن، وراحت عليهن، فكل ما أقرر انفصل أتراجع...

يومها كنت معزومة عندهم، اتغدينا وكل شي تمام، قمت أجلي مع خواته، إلا هو بحكي لخواته هاي شو مهمتها هون، اقعدن بتجلي لحالها، أنا عصبت وقلتله هاي! أنا اسمي هاي... ضربني كف قدام الكل، بهاللحظة تمنيت لو تنشق الأرض وتبلعني، معرفتش شو أعمل، حملت أغراضي وطلعت من بيتهم، لحقني يراضيني، ما قبلت. قعدت أفكر بالتنازلات إلي تنازلتهم مشانه حبيبي، من أول يوم وهو يتأمر وأنا أحكي حاضر، أهلي طلبوا مهر 3000 دينار قالهم لا غالي 1500 وأنا قعدت أقنع فيهم، حفلة بصالة ما عملت، غير هيك كل شي مثل ما بده وخلص ما بياخد رأيي بشي.. بس الشي إلي كاسر ضهري إنه صار علاقة بينا وإنه إحنا متل المتزوجين!

بس أنا مش قادرة أكمل معه، خايفة من الفضيحة، وخايفة أكمل معه ....
بس حكيت بفضل أضل طول عمري مش متزوجة ولا أتزوج واحد شكاك ...
اتصلت عليه وحكتله طلقني، صار يحكيلي فشرت عينيك، بخليكي هيك طول عمرك ولا أطلقك ...

رحت حكيت لأهلي، شمتوا فيي حكولي مش اختيارك، بدك تفضحينا بين الجيران والقرايب، عماتي يتشكشكن إوعك تعمليها. أنا حاليا مش عارفة شو أعمل، كيف بدي أخليه يطلقني، حياتي جحيم والكل بضغط علي بتمنى تساعدوني، فكرة أرجعله مستحيلة! وخايفة ينكر إلي صار. القصة حقيقية والبنت بدها مساعدتكم".

كتابة: هديل قاسم