نابلس.. نهفات وحكايات سائقي التكسيات

الحكاية الأولى: "طلعت مرّه معي وحده ست ونسيَت غرض بالسيارة، فكان ابنها بستناني بالبلد وحكالي أمي نسيت معك غرض بالسيارة، فعطيتو اياه وكان "بابوج". حمّلت نقلة ثانية ورجعت لقيت الولد واقف والكيس معه، حكيتلو مالك عمي؟ بحكيلي بتسلم عليك أمي وبتقلك البابوج إلي اشترتو لونو سيلفر وهاد أسود، حكيتلو قول لأمك تروح تراجع الشركة ومش أنا". الحكاية الثانية: "شب طلع معي كان بحكي بتليفون، فقال يعطيك العافية، فأنا وقفت عشان ينزل، فشفت ما حدا نزل، فسألتهم مين اللي حكى يعطيك العافية؟ وإلا الشاب بحكيلي: لا لا.. بحكي بتليفون". الحكاية الثالثة: "في عنا قرية اسمها صير، طلعوا بنتين مع شوفير، فحكوا للشوفير احنا الثنتين ع صير، فسمع الشوفير انو بدهم عصير، فنزل على الدكانه اشترى قنيتين عصير، ورجع ناولهن إياهن، فسألوه ليش هدول؟ فقال انتو طلبتوا. فضحكوا البنات كتير وحكولوا احنا الثنتين بدنا نروح على صير". الحكاية الرابعة: "طلعت معي مرّه بنت بدها تروح على قرية عسلة، فوصلت لعزون ونزلت الركاب وضليت ماشي لعسلة، بعد ما وصلت بحكيلها: تفضلي عمي، فش حدا رد، لفيت وجهي ما لقيت حدا بالسيارة غيري، فضليت أسب على حالي". الحكاية الخامسة: "مرّه طلعت بهالركاب على نابلس ووصلتهم لعزون ونزلوا، وبعدها روحت على بيتي وصفيت السيارة وطفيتها وجاي أنزل ولا طرقت عيني عالمراية ولقيت بنت ورا بالسيارة، قلتلها شو بتساوي يا عمي؟ قالت بدي أروح على قرية الفندق، فشغلت هالسيارة ومشيت". الحكاية السادسة: "في مرّه وحده طلعت مع شوفير من خطنا ونسيت تلفونها معاه وروّحت عالبيت، وحكت لأبوها، فاتصل الزلمه عليّ أنا وحكالي أبو خالد القصة هيك هيك والسيارة اللي ركبت فيها قديمة، حكيتلو احنا 4 أو 5 سيارات قديمة، يعني مع مين؟ حكالي أقرع، حكيتلو كلنا قرع. حكالي الشوفير وهو ماشي بعطي حركات غريبة، حكتلو خلص وصلت الرسالة، هو هاد الشوفير فش غيرو".   الكاتبة: فرح ناصيف المحرر: عبد الرحمن عثمان