"نهفات" الركاب والسواقين

حياتنا مليئة بالحكايات فأين ما توجهنا نجد حكاية نسمعها من جدنا وجدتنا من أبينا وأمنا من البياع وشوفير التاكسي واليوم جئنا لكم ببعض الحكايات التي يرويها شوفرية تكاسي من وإلى نابلس مع الركاب. "طلعت معي مرة وحدة ونسيت غرض معي بسيارة فكان ابنها بستناني بالبلد وحكالي أمي نسيت معك غرض بسيارة، فأعطيته وكان بابوج فحملت نقلة ثانية ورجعت لقيت الولد واقف والكيس معه قلت له مالك عمي؟ بحكيلي بتسلم عليك أمي وبتقلك البابوج إلي اشترتو لونو سيلفر وهاد أسود حكتلو قول لامك تروح تراجع الشركة مش عندي" "شب طلع معي كان بحكي بتلفون فحكى يعطيك العافية فأنا وقفت عشان ينزل فشفت ما حد نزل فحكالهم مين الي حكى يعطيك العافية ولا بحكيلي لا لا بحكي بتلفون". "في عنا قرية اسمها صير طلعوا بنتين مع الشوفير فحكوا للشوفير إحنا تنتين على صير فسمع الشوفير إنه بدهم عصير فنزل على الدكانه اشترى قنيتين عصير, ورجع ناولهن إياهن فحكولو ليش هدول فحكالهم انتو طلبتو فضحكو البنات كتير وحكولو احنا التنتين بدنا نروح على صير" "طلعت معي مره بنت بدها تروح على قرية عسلة فوصلت لعزون نزلت الركاب وضليت ماشي لعسلة بعد ما وصلت بحكيلها تفضلي عمي فش حد رد, لفيت وجهي ما لقيت حد فضليت اسب عحالي" "مرة طلعت بهالركاب على نابلس ووصلتهم لعزون ونزلوا وبعدها روحت على بيتي فصفيت السيارة وطفيتها وجاي أنزل ولا طرقت عيني عالمراية في بنت بالسيارة من ورا قلتلها شو بتسوي يا عمي قالت بدي أروح حكتلها من وين إنت؟ قالت من الفندق فشغلت هالسيارة ومشيت". "في مره وحدة طلعت مع شوفير من خطنا ونسيت تلفونها معاه فروحت عالبيت وحكت لأبوها فاتصل الزلمة علي وحكالي أبو خالد القصة هيك هيك والسيارة الي ركبت فيها قديمة قلت له إحنا 4 أو 5 سيارات قديمة يعني مع مين حكالي أقرع حكيت له كلنا قرع حكالي الشوفير وهو ماشي بعطي حركات غريبة حكتلو خلص وصلت الرسالة, هو هاد الشوفير فش غيرو"   الكاتبة: فرح ناصيف