إلغاء إضراب جامعة النجاح...يثير بلبلة فيسبوكية

أثار قرار إلغاء الإضراب في جامعة النجاح الوطنية ضجة واسعة في أوساط الطلاب، خاصة طلاب السكنات الذين عادوا إلى مدنهم وقراهم، بعد التأكيد على استمرار الإضراب لأيام الاثنين والثلاثاء والأربعاء. حيث غردت إحدى الطالبات معلقة على القرار: "كل الاحترام للجامعة كجامعة بكوادرها، لكن السؤال هنا: هل للمجلس أي أحقية في حل إضراب هو ما بعرف منه شي؟!" وتضيف: "في منشور نزلته صفحات المجلس وصفحة رئيس المجلس بيحكي "حرصاً على طلابنا وحقهم...إلخ" وإنه مصلحتهم اهم، أنا بدي أفهم وين مصلحة الطالب إلي رجع اليوم لمدينته وقريته ورح يرجع يداوم بكرا؟ أصلاً كيف يدو يرجع الساعة 5 الصبح إذا كان من الخليل وبيت لحم او الداخل". وتكمل: " ظن إنه 3 سنين عاشتها جامعتنا تحت حكم ونظام المجلس، وعاش فيها الطالب بذل وتشحطط والتعن أبوه ودفع كل شي، وما بحياتنا حسينا بوجوده إلا بصورة بنزلوها بعد كل عجقة إلهم، وبقولوا لك الطالب! إذا فعلاً أنتم بتفكروا بالطالب إضربولكم يوم مشان الطالب نفسه مشان حقوقه". وتنهي كلامها بقول: "مشكلتي ليست مع المجلس، مشكلتي مع الغلط، مع الناس إلي بتفكر إنها بتعمل شي منيح وهيما بتزيد الطين إلا بلة، فكروا في الطالب الحزين، وعزيزتي جامعتنا خلي إلك موقف لمرة واحدة، مش تتناوبي إنت ومجلسنا مين بذل الطالب اكتر". أيضاً طالبة من بيت لحم تقول: "مجلسنا الموقر، قرف إلي يقرفكمن والمرة الجاي إذا بدكم تساعدوا راعوا الطلاب إلي روحوا على بيوتهم وبدهم يرجعوا بكرة من الصبح، شكراً كتير". يضيف طالب آخر: "شكراً يا جامعتي لأن مصلحة الطالب عندك أهم شي، عادي الطلاب يطلعوا من السكناتت وهم مروحين يجيهم خبر إنه الإضراب التغى، لما طلاب من الخليل وبيت لحم والداخل يقطعوا مسافات كبيرة مشان يروحوا، وبالآخر تحكولهم التغى الإضراب". طالبة أخرى تعلق على الموضوع قائلة: "يعني أنا بدي ينفك الإضراب، بس حركة نذلة منهم يفكوه في هيك وقت، والطلاب إلي روحوا على مدنهم وقراهم مصاريهم حرام؟ ولا لعبة فايدين أكم واحد؟ شيء بخزي". "مجلس ونقابة بدهم كومة مسبات، بعد ما وصلت البيت ألغوه كان نفسي أشوف شي متل الخلق بالجامعة قبل ما اتخرج، بس شكلها رح تضل بنفسي" هذا ما يقوله طالب آخر من طلاب السكنات رداً على القرار. وتضيف طالبة أخرى: "الله لا يعطيكم العافية لا مجلس ولا نقابة فوق جهودكم المهزلية، إلي بعرف من وين بفكروا إن كان مجلس أو نقابة يحكيلي". تعليق آخر يقول: "جامعة بدها حرق، روحوا طلاب السكنات وبعدها ألغوه، كل يوم بقرار وكل ساعة بفكرة...حرق". أما طالبة أخرى فعبرت عن استيائها بهذا القرار، حيث قالت: "على فكرة لازم بكرة يكون إضراب طلبة؛ بسبب البهدلة إلي أكلوها طلاب السكنات... ما رح أحكي غير إنه الطالب لا يحترم في مجتمعنا، على عكس الدول المتقدمة بتقدس الطالب".