نابلس: لم ينتبه الطبيب إلى الركبة المقسمة إلى 3 قطع!

الشاب (غ.ع) يروي لـدوز ما حدث مع والده قبل بضعة أيام في مستشفى بمدينة نابلس: "عمل أبوي حادث وكان بسوق تركتور وقلب فيه، غاب عن الوعي وهو جنب الطريق". ووصلت سيارة الإسعاف بعد حوالي 20 دقيقة من وقوع الحادث، بعدها تم نقله إلى إحدى المستشفيات الخاصة بنابلس. ويكمل الشاب قصة والده: "قدموا له الإسعافات الأولية وبعدها عملوا له صورة أشعة، ومن الصورة بيّن عند الدكتور إنو في شُعر بكعب قدمه، فجبصنوله إياها. أما ركبته فكانت نافخة كتير ولونها أزرق، ولما سألنا الدكتور حكالنا ما في إشي: صورناها ووضعها منيح وركبته هاي رضة من الحادث". "بعد ما طلعنا على الغرفة، كان أبوي نايم وفي دم بنزل عالمخدة تحت راسه. قمنا لفينا راسه وإلا هو في جرح كبير براسه وبنزف منه، فنادينا على الدكتور، قام حكالنا مش منتبهين، بعد ثلاث أو أربع ساعات. وما كان ينزف كثير لإنو كان نايم عليه وفيه ضغط عالجرح". "طول الليل وهو يشكي من ركبته، وهي كل مالها بتورم بزيادة. والصبح رد إجا الدكتور وحاول يوقف أبوي بالغصب ويمشيه عليها، وأبوي يحكيله مش قادر ومع هيك وقفه ومشى وهو يتوجع. أبوي قال للدكتور، ركبتي فيها إشي مش طبيعي. قام الدكتور جاب صورة الأشعة ليتفرج عليها، ما لقي صورة للركبة، قال ناسيين يصوروها مع إنه الدكتور طول الوقت يقول لنا صورناها وكل شيء تمام". "المهم لما صوروها، بيّن إنه الركبة مقسومة ثلاثة أقسام، يعني ثلاثة كسور وبدّه عملية ليرجعوها. والدكتور يحكي لأبوي: أنا بعمل العملية زبطت زبطت، ما زبطت بشيلك إياها هاي العظمة مش ضرورية. انقهرنا كثير منه وحوّلنا أبوي عمستشفى ثاني. عملوا له العملية وكانت ممتازة جداً وما شال الدكتور ولا عظمة".   دوز