رواية شقيق السائق المتهم بابتزاز عائلة مقدسية

".. أنا عبدالله مصطفى جازي، أخ سائق التكسي العمومي اللي حصلت معه المشكلة مع الجماعة المقدسية، أولا كل الاحترام لأهلنا بالقدس واحنا بنفتخر فيهم وصمودهم بأرضهم ودفاعهم عن المقدسات في القدس، وثانيا الموقف اللي حصل مع أخي حسن جازي، كان ماخذ بنته على المركز الصحي بقبلان فبالصدفة التقى بالجماعة المقدسية على مفرق قبلان، فبوقفو وكان برفقته أمي وأخوي الثاني فبيجي واحد من الجماعة على أخوي بحكيله احنا تايهين عن الطريق بدنا اياك ترشدنا على الطريق بدنا نطلع عالقدس واللي بدك اياه بنعطيك اياه.

رجع أخوي عالبلد ووصل أمي وبنته المريضة ورجع عند الجماعة عمفرق البلدة وبعد ما قطع فيهم أكثر من خمس قرى مش مثل ما بحكو 6.5 كيلو متر وصلهم لبعد سوبر ماركت رامي ليفي فواحد من الجماعة بيجي بعرض على أخوي مبلغ 20 شيقل، طيب يجماعة يعني هل يعقل إنه شوفير تكسي على الساعة وحدة ونص بالليل يلف كل هالقرى ويعرض نفسه وسيارته وأخوه للخطر بهاي الأوضاع مقابل 20 شيقل، فأخوي الشوفير انصدم وحكالهم بالحرف الواحد انو هذا الحكي مش صح لو شوفير تكسي ثاني ما برضى يطلع في هاي الأوضاع وفي هاي الساعة المتأخرة من الليل اقل من 400 شيقل فبعد هيك حكالهم ادفعوا الي بطلع من نفسكم بس بحق الله فالجماعة الله يسامحهم ركزوا ع كلمة 400 شيقل وهو فعليآ المبلغ الي اخذوا منهم 200 شيقل بعد مروره اكثر من خمس قرى وقطع مسافة طويلة.

وبالنسبة لموضوع الدبسات والعصي وانو اخوي قام بالاعتداء على الاطفال والنساء الي معهم هاض كلام واقسم بالله غير صحيح والفيديو واضح لكن تم اقتطاع الكلام الاولي الذي تحدث عنه اخوي انو لو شوفير ثاني في نص الليل كان اخذ 400 شيقل وهاي القصة الي حصلت وأنا مبلوم الناس اللي ما فهمت القصة، المفروض يسمعوا للطرفين وليس لطرف واحد وفي النهاية نحن باسمنا وباسم والدنا نعتذر إذا بدر منا غلط إذا كان في غلط بالأصل، خلاصة الحكي هاض الكلام مش تبرير ولكن للتوضيح مش أكثر من هيك دمتم بخير والسلام عليكم".

المصدر: أجيال