نصيحتي للطلاب في بداية الفصل: تنحووووا

مش قصدي أتفلسف، بس لأنو الحياة تبادل تجارب وإفادة للغير، ولأنو نسبة كبيرة من الأصدقاء عندي على الفيسبوك طلاب جامعات، حابة أحكي كلام بتمنى كتيرين يستفيدوا منه: الجامعة مش مشوار، الجامعة دراسة كتير وتعب مع شوية مشاوير وانبساط. ما رح تبطل "COOL" إذا درست وحضرت محاضرات وعملت جدول امتحانات. تجربتي بالجامعة كانت حلوة، درست وتطوعت وشاركت ورحت وإجيت، بس ما كنت أطنّش، كنت أروّح كل يوم أدرس اللي أخدته بالمحاضرات. وأحل الواجبات اللي أعطوني إياها الأساتذة، وأحضّر للمحاضرة إللي وراها وأعطي لكل امتحان مش أقل من يومين: يوم أستعرض فيه المادة ويوم أتمكن منها. وأسهر على المشاريع حتى أسلمها بالموعد المحدد. وكان عندي زملاء وأصدقاء أثبتوا إللي بحكيه وأكتر. بعرف طلاب مميزين بحددوا بالورقة والقلم كل نص ساعة بيومهم كيف رح يقضوها. وبعملوا ملخصات للكتب الزخمة لحتى نفهمها، وبكتبوا بألوان حلوة لحتى يكسروا الجمود، حتى بيعملوا خطط ترفيهيه لأوقات فراغهم. بس ما كانوا غريبي أطوار، ولا القمل طالع من شعرهم، وكانوا يطلعوا ويلبسوا ويحضروا متل ما بدهم، لأنهم منظمين وقتهم، ومتبعين لدروسهم. الخلاصة: لكل طالب\ة مش عارفين ينقذوا حالهم ومعدلهم عليكم بالدراسة اليومية. ما تحفظوا، بس المهم ما تكونوا -متل الأطرش بالزفة- وولا مرة بفوت الوقت. ومن تجربتي بالجامعة: معدل أول فصل إلي بالجامعة كان 1.9 (مقبول)، بس لما غيرت سياسة اللامبالاة واللعب واتبعت السياسة إلي ذكرتها ارتفع لـ 3.20 (جيد جداً). الحل: "التناحة"، تنحووووا واشتغلوا واسهروا حتى تتحقق أهدافكم.   الكاتبة: روند حطاب المحررة: جلاء أبو عرب * هذا المقال لا يعبر بالضرورة عن رأي دوز