معقول نبطل صاحبات بعد التخرج؟

كنت قاعدة أنا وياها وبحكيلها: "سمر معقول إحنا بعد التخرج نبطل صاحبات هيك؟". حكتلي "لا مستحيل. أنا وياكي صحبة من صف تاسع. رح نضل مع بعض عطول". قلتلها: "خايفة الحياة تفرقنا، وكل وحدة تروح بطريقها ولحياتها، وأنا وياكي نخسر بعض". ضحكت وحكتلي "لا.. رح نضل مع بعض ولو انشغلنا". 
مشت الأيام وأجت لحظة التخرج. اللحظة الي أنا وياها بنستناها من سنين. كنت لابسة ثوب فلسطيني وهي لابسة نفس الثوب. فتنا نناقش مشروعنا مثل التوأم. أصلا الكل كان يشوفنا بنشبه بعض. 
كانوا يشوفونا خوات، لأنه ولا مرة افترقنا. كل لحظاتنا بالجامعة كانت مع بعض. بتذكر لما كانت تغيب سمر أنا ما أعرف أتحرك بالجامعة. يصيروا صاحباتي يضحكوا علي ويحكوا وين رينكو؟ كان اسمنا زينكو ورينكو! 
بلشنا نناقش وخلصنا. الدكاترة عجبهم المشروع كتير، وجبنا علامة عالية فيه. بعدها طلعنا أنا وياها آخر طلعة سوا. نزلنا على البلد مشي وإحنا حاملين الورد والكل يطلع علينا. وقفنا شوي بالشارع وصرنا نحكي: "ولك رح نشتاق للشارع صح؟ هاد بعرف كل مصايبنا. بتتذكري لما كنا نحكي عن رانيا إنها زنخة وما بنطيقها وطلعت ورانا...". أنا فرطت من الضحك. قلتلها: "وليش وإحنا نحكي عن أحمد إنه نسونجي وبحب كل البنات، وطلعت حبيبته ورانا (..) ولك كم مرة هالشارع انفضحنا فيه؟". ضحكت بصوت أعلى وحكتلي: "ولك هاد ولا إشي جنب القهوة الي كنا نشتريها وتنكب عليكي. يمااااا منظرك"، وفرطت ضحك. قلتلها: "بلا زناخة. عأسساس إنتي لما شريتي شاورما وصرتي تكبكبي عحالك ما هو كل صورك عندك..".
 وصلنا آخر اليوم، بعد يوم من العمر ودعتها وودعنتي. أنا من بلد وهي من بلد والبعد بينا هو حاجز! حاجز أنا ما بقدر أزورها إلا بتصريح، لأنها هي بفلسطين الداخل!  يا الله بعدها شو تغير شغلات. أولها كنا نحكي كل يوم عالفيسبوك، بس بعدد فترة تغير كل شي. هي أجا شب وخطبها والتهت معه وأنا توظفت والشغل أخد كل وقتي. كانوا كتير بنات يسألوني عنها وكنت أجاوبهم كأني معها! وهي كانت نفس الشي. حاولت أكتر من مرة أطلع تصريح وأزورها وما كانت تزبط. حتى بيوم خطبتها ما قدرت أكون معها.
بعد سنة تخرج رنتلي وحكتلي: "أنا رح آجي ورح نقضي اليوم كله مع بعض". تقابلنا أنا وياها. كأنه ما بعدنا ولا لحظة عن بعض. كل قصصنا ودواوينا هي هي. عارفين مشاكل بعض وبنحكي كأنه امبارح افترقنا. حكتلها: "بتعرفي؟ حسيت إنه خسرت صداقتنا، لأنه كل وحدة راحت لحياة وانشغلت فيها". حكتلي: "بتتذكري قلتلك ما رح نبعد عن بعض؟ صداقتنا مش بس حكي 24 ساعة صداقتنا هي أنا وإنتي خوات وصديقات بكل مكان وزمان ورغم كل شي ولو بعد 50 سنة. ويلا هاتي وجبة شاورما ناكلها".
ضحكت وقلتلها: "أنا صرت نباتية!". ضربتني عضهري وحكتلي: "أصدق؟ إنتي كل شي بتغير فيكي إلا بطنك". صرت أعيط وأحكيلها: "بس أنا مشتاقة لشارعنا ولأحكي معك أكتر وتضلي معي". هي صارت تمسح بدموعي وتحكيلي: "أصلا رح نروح عليه هلأ".
الصحبة الحقيقة ما بتتغير مع الزمن. ما بتتغير لما تبعدوا عن بعض. في ظروف بتجبرنا نبعد بس أكيد بنضل صحبة وأكتر.

الكاتبة: هديل قاسم
*هذا النص لا يعبر بالضرورة عن وجهة نظر دوز