تزوجت بعد ما خلصت توجيهي!

"تزوجت بعد ما خلصت توجيهي مباشرة!
كنت أصغر وحدة بتتزوج بعيلتنا
لهيك كل قريباتي حكولي والله ما رح تكوني مبسوطة معه، بعد كم سنة رح تندمي إنك تزوجتي!
بس أنا كنت بحبه من سنتين والشب بحبني وما بدنا نضل نحكي بدون ما يكون شي رسمي بينا..
كان حبنا أساسه الاحترام، لا بطلع ولا بنزل معه، حكي وبس وكنت بحس إنه بفهمني..
وفعلا أول ما خلصت توجيهي إجا تقدملي..
أبوي بحب العلم كثير، لهيك رفضه، وإمي كانت بدها أتزوج واحد غني لحتى يسعدني!
بس أنا أصريت عموقفي، وخاصة إني كنت مش ناوية أروح عالجامعة...
بعد شهرين أهلي وافقوا لإنه الشب محترم وسمعته طيبة ببلدهم وأهله ناس مناح كثير..
كتبنا الكتاب، وثاني يوم إجا بحكيلي تعالي بدي تسجلي بالجامعة، حكتله أنا بديش أدرس
قلي مش عخاطرك لازم تدرسي...
طيب لما نتزوج شو رح أعمل؟
قلي عادي رح نتزوج كمان سنة بتكوني خلصتي أول سنة وهينا بنفس المدينة اللي فيها الجامعة رح نسكن...
فعلاً اقتنعت وسجلت بالجامعة، بس دخلت الجامعة حسيت إني ملكت شي جديد وحلو، كنت مبسوطة لإنه هو اللي دعمني لأدخلها، بتذكر وقتها، صاحبت بنت متزوجة، وكانت تضل تشكيلي عن زوجها وكيف محملها ألف جميلة إنها بتدرس، أنا خفت صراحة يعني بكرا لما نتزوج رح يعمل هيك..

مرت السنة وجبت معدل منيح بالجامعة، وتزوجنا، بعد شهرين من الزواج، كنت خايفة يكون مغير رأيه وما يخليني أرجع، إجا لعندي بحكيلي هاي قسط الجامعة، سامحيني تأخرت عليكي بس ما كنت عارف أمنلك ياه!
وقتها يا الله شو عيطت، وحبيته اضعاف حب إله طول السنين، كملت جامعة لما صرت بسنة ثالثة، خسرت صاحبتي المتزوجة، ما قدرت تكمل وطلعت من الجامعة، يا الله شو عز علي فراقها، وشو كرهت زوجها وأنانيته! مش عارف يصبر هالسنة...
حملت وأنا باَخر فصل، صار عندي دوخة واستفراغ ومش قادرة أشتغل عمشروعي التخرج...
لقيته بساعدني في، ويسهر معي طول الليل مع إنه عنده ثاني يوم شغل، كان نفسي أعرف ليش هالقد مصر يخليني أنجح وأخلص جامعة... سألته وقتها لي كثير بتهتم بتعليمي!
قلي يوم تخرجك بجاوبك ...
فعلاً تخرجت بمعدل منيح، ويوم حفل تخرجي إجا لعندي وكان حامل بوكيه ورد؛ قلي مبروك أنا كتير فخور فيكي اليوم!
حكتله شو السر إنك أصريت أتعلم..
قلي يومها: لو ما خليتك تتعلمي كان كل ما شفتي وحدة متعلمة رح تصير حسرة بقلبك، مع الأيام رح تبلشي تندمي إنك تزوجتي وضيعتي هالمرحلة، أنا ما تزوجتك لأنهي حياتك، بالعكس أنا تزوجتك لإني بحبك وبدي ننجح أنا وإنتي بحياتنا، هيك اليوم بطمن عولادي إنه أمهم وحدة قوية وقدرت تتجاوز كل شي وتعلمت....
صرت أعيط
قلي مالك؟
قلتله صاحبتي نحرمت من هالفرحة لإنه زوجها مش مثلك..

الزواج مش نهاية العالم ولا نهاية طموحك وأحلامك، مش دائما إذا تزوجتي صغيرة يعني خلص راحت عليكي، الاختيار الصح لو شو ما كان عمرك رح تكوني سعيدة معه، اختاري اللي من أول يوم يتمنى يشوفك ناجحة، لإنه عمرك ما رح تندمي معه.. لكل بنت تزوجت وهي صغيرة وندمت..

ولكل بنت لسا ما تزوجت حلو تعيشي مراحل حياتك كلها وما تستعجلي عالزواج وطبعا لما تكوني بعمر أكبر بكون قرارك أوعى وأحسن بس إذا قررتي تتزوجي أو الظروف حكمتك تتزوجي اختاري صح..

وهالقصة مو تشجيع على الزواج المبكر لأنه الواعية بتعيش حياتها صح وبتنجح لحالها".


الكاتبة: هديل قاسم

* هذا النص لا يعبر بالضرورة عن رأي دوز