ناس دوز لهذا الأسبوع

"كنت عم بمشي هداك اليوم مروحة من الشغل، في واحد كل يوم بشوفوا بمسح قزاز السيارات ع الإشارة،، كل ما يقرب ع سيارة يصرخوا عليه يقولولوا ما بدنا ما تمسح. وقف الزلمة ع زاوية الإشارة وصار يصيح (أنا ما بشحد! أنا بشتغل! أنا بدي ألبس زيي زيكم أنا بدي اكل! أنا جعااان) والناس سامعين ومش سامعين بمرقوا عنه كإنه عمود كهربا أو شجرة مزروعة بالشارع. لهلأ مش قادرة أنسى القهر اللي حسيتو بصوته".

[caption id="attachment_24363" align="alignnone" width="960"] كرمة[/caption]

"الناس بأمريكا كانوا يسألوني إذا كنت من باكستان لما أحكيلهم إني من فلسطين. وكانوا يسألوني إذا بروح عالمدرسة عالجمل وإذا كان عنا مدراس أصلا! الحلو بالموضوع إني كنت أشطر منهم بصف الإنجليزي وبحكي 5 لغات".

[caption id="attachment_24364" align="alignnone" width="800"] أحمد[/caption]

"أنا بحب التغيير والعفوية وبحب أجرب أشياء جديدة، تعرضت لكتير مضايقات من أصغر الأشياء متل شعري سواء إلكترونياً أو بالشارع أو الجامعة. كل ما في الموضوع إنو كل واحد عندو إشي بميزه عن غيره. أنا بعتبرها حرية شخصية، لإنه الإشي الغريب أو المختلف مش معناه إنو إشي مش صح".

[caption id="attachment_24365" align="alignnone" width="960"] ياسمين[/caption]

"نفسي أطلع مع شفير تكسي ويحكي إشي منيح عن هالبلد".

[caption id="attachment_24366" align="alignnone" width="960"] زيد[/caption]

"أحلى أيام حياتي بلشت من وقت ما انولدت أختي. كتير سمعت كلمة "الله يعينكم"، وهاد الحكي السلبي من الناس. بس كل هدول العالم ما بعرفوا إنه لولا أختي كانت حياتي جد فاضية. هي البسمة والفرحة بالبيت وهي اللي بتقربنا. وجد بحمد الله مليون مرة على وجودها معي. هي سعادتي بالحياة".

[caption id="attachment_24367" align="alignnone" width="639"] لين[/caption]

"بعد ما تخرجت من الجامعة فتحت شركة للاستشارات الإدارية، الوضع ممتاز الحمد لله. بس أوقات بحس حالي بشتغل أكتر من اللازم وبحس حالي بعيد عن عيلتي وصحابي، لدرجة إنو بطلت أحكي مع حدا في غير الشغل. خايف في يوم من الأيام أندم على كل الوقت اللي عم بقضيه في الشغل وما قضيتو مع عيلتي وأهلي والقراب علي. ماما، بابا وإخوتي بحبكم كتير".

[caption id="attachment_24368" align="alignnone" width="960"] محمد[/caption]

"من أهم مبادئي بالحياة هو إنك تسعد نفسك بنفسك، يعني مرة شريت لحالي وردة وكان شعور بجنن لإنو إذا الشخص حب نفسه، الحياة والناس أكيد رح تحبه. بحب أتعامل مع الناس ببساطة وعفوية، وبحلم إني أصير شخص مؤثر ومنتج بالحياة العملية، وبدي أحقق حلمي وأصير من كبار الإعلاميين. وبدي أقول حب نفسك تفرح! وما توقف ع أي محنة بتصير معك بالعكس رح تصير أقوى بكثير وبتتعلم من أخطاءك وتجاربك. ومتل ما قال غسان كنفاني: لك شيء في هذا العالم فَقُم".

[caption id="attachment_24397" align="alignnone" width="1024"] اَمنة[/caption]

Dooz.ps