خطبت شب ما بعرفه!

"اليوم خطبتي على شب ما بعرفه!
كان المفروض تكون على الشب ‘لي حبيته من سنين...
بس للأسف ما قدر يوفي بوعده إلي وما ‘جا يخطبني
قبل ٤ سنين، كنت بنت ضد الحب، ما بدي أقرب عليه ولا حتى مقتنعة فيه، كانوا صاحباتي حوالي بحبوا كلهم، ولما يزعلهم حبيبهم يجو يشكولي أحكيلهم اتركوهم شو بدكم فيهم!
مكنتش بعرف شو وجع الحب ولا متخيلة إنه في لحظة بوقف فيها القلب عفراق اللي بنحبه...
تعرفت على محمد وأنا سنة ثانية جامعة، كان ياخد محاضرة مادة اختيارية معي، لنص الفصل وهو يجي وأنا ما أنتبه لوجوده، بيوم غاب عن المحاضرة، ولما رجع بعدها طلب دفتري، أنا كنت شاطرة بالرسم كثير وبرسم عكل صفحة، بس رجع الدفتر بحكيلي ما عرفتك رسامة...

ووقتها ضافني عالفيسبوك ليشوف رسوماتي، كان حكينا خفيف كثير، بعدها بلشنا نتعود على بعض، تحول لإعجاب؛ وبعد سنة صداقة اعترفلي إنه بحبني..
هالكلمة اللي خربطت كل حياتي، كنت بالأول حاسة إني أسعد مخلوقة بهالكون، طايرة بحبه واهتمامه، بس بعدين كل شي بلش يتغير...
كنت زمان بنت مرحة كثير؛ حياتي بتوقفش عحدا، قوية وعايشة كيف ما بدي، دمعتي ما بتنزل؛ ودائما أضحك...
بعد ما حبيته، صارت حياتي مرهونة فيه، أضحك على ضحكته، أعيط لما يبطل يهتم، بطلت أعرف أنام بالليل، لما ما يبعتلي يطمن علي، صرت أمسك التلفون كل ثانية لأشوف بعث شي أو لا..
صرت وحدة كئيبة كثير، حتى صاحباتي لاحظو هالشي...
بعد حب سنتين قلتله: ما بدنا نخطب؟ قلي أكيد، كانوا يتقدمولي ناس وأرفضهم. بيوم تقدملي شب منيح كثير، قلتله، قلي إذا بتوافقي بموت!
رفضت مشانه، بس هو ما اتحرك بالعكس كان ببعد عني بطريقة غريبة كثير..
لا هو باعد ولا هو مقرب، مكنتش فاهمته، مرة صارت مشكلة كبيرة قلتله إذا ما بتيجي تتقدملي رح ينتهي كلشي؛ ومروا الشهور ولا عمل إشي...
بعدها بكل برود قلي إحنا ما بنفع نكمل مع بعض.
أنا وقتها حسيت كل شي انهار قدامي، صرت أشغل حالي بأي شي لأنسى، تعذبت كثير ووجعني قلبي، حسيت بشغلات غريبة، وصرت أحكي معقول الحب حرام لهيك ربنا بعاقبنا في!
ضليت فترة طويلة أرفض الناس اللي بتقدمولي، هو بعد ما تركنا بـ ٣ شهور خطب بنت ثانية!
وأنا من وقتها حسيت حياتي انتهت، صرت دائما تعبانة ووجهي شاحب وأي شي يذكرني فيه أبكي، أكرهه وأحبه بنفس الوقت! بس هو أخد وحدة ثانية...