"صار عمري 28 وأنا مش متزوجة"

"صار عمري ٢٨ وأنا لسا مو متزوجة
كل الناس بطلعوا علي بنظرات حزن وشفقة وخاصة إنه كل البنات بعيلتي متزوجات وعندهن ولاد!
أنا بنت حلوة وما بعيبني شي وكل شي فيي حلو ومؤدبة، وعندي شغلي ومقسطة سيارة على راتبي، وبساعد أهلي
بس الناس عالطالعة والنازلة بحسسوني إني ناقصة لإني مو متزوجة!
حتى قريباتي كل ما يشوفوني بكونوا يتحالوا بزواجهن وولادهن وإمي عالطالعة والنازلة بتحكيلي لمتى بدك تضلي ترفضي...

كل مشكلتي إنه أنا بختلف عنهم، يعني بتذكر بنت عمتي، كان كل همها تتزوج واحد غني وحلو ومش هاممها شي ثاني.. ولما تقدملها زوجها حكالها بدي تطلعي من الجامعة وأنا بصرف عليكي ووافقت هي بدون تردد!
أنا يومها حكيت لإمي لو صار معي هالموقف طردته من الدار...
زورتني بنص عين وحكتلي اه خليكي إنتي وأحلامك
وإجت عمتي عنا وبلشت تحكي خطيب بنتي ما في منه!
جبلها دهب بـ ٦٠٠٠ دينار مش ٥٠٠٠
وبيته بجنن وسيارة عنده اَخر موديل...
وكانت بنتها معها، وتحكيلها اه والله خطيبي وخطيبي وخطيبي ...
هاي البنت نفسها قابلتها بعد ٤ سنين زواج كانت قرفانة حياتها ومعها ولدين مشيبينها وكإنه عمرها ٤٠ سنة وبتحكيلي نيالك عايشة حياتك!

مشكلتي كانت إني ما بفكر مثلهم، أنا بنت مو ناقصني لا تعليم ولا مصاري؛ تعديت فكرة إنه بحاجة لزلمة يكون غني ليحققلي أحلامي... أنا مستقلة مادياً ومو ناقصني شي، عايشة حياتي بالطول والعرض، مو ضد الزواج، بس إذا بدي أتزوج بدي واحد يزيد عحياتي إشي حلو!
يعني الإشي الوحيد إلي رح يخليني أرتبط إنه يكون حنون وطيب، ويكون محترم وبسندني!
هيك لما حكيت لإمي صفنت فيي وحكتلي يختي وين بدك تلاقي هالشب! خليكي على عنادك ....
وفعليا كثير ناس تقدمولي، بس ما كنت لاقيهم فيهم هالشي، معظمهم طمعانين بالراتب، والثانين ما بدهم أشتغل وإشي بحكيلي بحبش المرة القوية!

لما قربت أصير ٢٩ كان في ندوة عن السوشال ميديا والمرأة وإنه زادت حالات الطلاق بوجودها...
يومها غمزتني المديرة وقالتلي اطلعي اشرحيلهم وجهة نظرك
طلعت وحكيت، هالأيام البنت صارت متعلمة ومستقلة بذاتها، بطلت تبحث عن واحد يعطيها فلوس وبس؛ لإنها هي كافية حالها ماديا، هي بحاجة لشريك يسندها، ويساعدها لتحقق ذاتها وأحلامها، يعني الشغلات المعنوية، وإذا اختفت بالزلمة فهي بتنسحب وبتطلب الطلاق!

بعد هالحكي وقفوا كتير ناس وصفقولي، وبعده بـ٤ شهور تقدملي أحمد، إلي كان حاضر الندوة وقلي أنا من زمان بدور على وحدة مثلك! وأحمد شب كثير وخلوق ومحترم وطموح، وهيني أنا وياه ماشيين لنحقق أحلامنا سوا وحياتنا ولا أحلى..