"تزوجي اللي بهتم فيكي مش بقلك إنه بحبك"

"لما تقدملي أحمد الكل رفضوا!
إلا أمي حكتلي هالشب منيح، صحيح وضعه مش كثير، بس رح يسعدك ... 
أنا وقتها ما اقتنعت بكلامها، حكتلها كثير بختلف عنا، وأبوي حكالها ما رح يقدر يعيشها نفس عيشتنا!
طبعا أحمد شب طموح كثير، بشتغل ووضعه عادي، ومش مخلي شغلة بالدنيا مش مشتغلها!
وين ما يروح بتلاقي تارك بصمة 
هو بعرفني من أنا بالجامعة، كان آخر سنة لما دخلت أنا، وتعرفنا بمحاضرة، كان شاطر كثير وأنا كنت خجولة وما أعرف أحكي مع حدا!
كان يساعدني دائما؛ ولما اتخرج بقينا على تواصل بسيط عالفيسبوك، وكلامنا محدود كثير، ولما حكالي بدو يتقدملي فاجأني كثير وما عرفت أرد عليه غير أهلا وسهلا ...
مع إنه عارفة أبوي كيف بفكر!
وفعليا أبوي رفض،  بس إمي أقنعته نعطي فرصة إذا أنا بدي ياه، صرت أفكر فيه وقعدت معه مرتين بوجود أهلي، كنت لما أحكي معه أحس شي غير، ضحكته كانت تعطيني قوة مش طبيعية، وكلامه بريح كثير .... 
قبل بسنة كان متقدملي واحد اسمه ساري، هاد عجب أبوي لإنه ابن عالم وناس ومهندس!
صح وضعه كمان عادي؛ بس أبوي اقتنع فيه بعكس إمي ما حبته وقتها وفعليا خطبنا شهر وفسخنا! ما ارتحت أبدا معه، كان يهملني كثير ويطنش وجودي، طول القعدة يضل يحكي عن حاله وما يعطيني مجال أحكي!

أنا بهالفترة صرت بدوامة، مش عارفة شو أعمل، شو هالتناقض الكبير؛ استخرت، وثاني يوم قلتلهم موافقة على أحمد 
خطبنا 4 شهور، أبوي بهالفترة توقعني أفسخ، وما أتحمل اختلافهم عنا! إجى قبل العرس بيومين وحكالي شو الإشي المميز فيه؟
حكتله 4 شهور ما بتذكر إنه مرة خلاني أنام زعلانة، كان لما يشوفني منكدة يعمل المستحيل ليخليني أضحك، ولما يشوفني مبسوطة يضغط حاله ولا يحكيلي مصيبة صايرة معه، حياته بسيطة كثير ، ما بلف ولا بدور مثل ساري؛ مستحيل يكذب علي، وأحلى شي إنه شايفني مش مصدق

أبوي اطلع فيي نظرة غريبة قلي هو الشب جدع، بس إن شاء الله يضل هيك بعد الزواج .... 

تزوجنا، كانت حياتنا بسيطة كثير؛ أنا ويا بنشتغل لنتساعد بمصروف البيت، كان يشجعني على كل خطوة مهمة بشغلي، وأحلى موقف، لما طلع عندي مشاكل وما بحمل، وقتها اكتئبت كثير، صرت ليل نهار أعيط، والناس ضغطوني، إجا لعندي وحكالي، هاي الخبزة بتعرفي شو قصتها!
حكتله لا ...
قلي كنت مارق على محل بدي أشتري خبز، إجا أخوي شافني بالطريق ووصلني على محل ثاني، لما وصلت اكتشفت إني ناسي جزداني فقررت أرجع، رجعت واشتريتها
حكتله شو يعني ... 
قلي يعني إلي إله نصيب بشي بياخده، لما ربنا يكتبلنا  بالولد رح يجي .... 
وفعلا بعد سنة من هالحكي حملت....
أبوي كان مكيف يحكيلي ما توقعتك تكون مبسوطة معه لهدرجة ...
حكتله صح صرلي 3 سنين متزوجة بس لليوم مشاكل خفيفة بس لي صارت بيني وبينه، كان دائما يحتويني، وحنيته مش طبيعية، حنوووون كثير وقلبه أبيض؛ ومستحيل يقبل تنزل دمعتي، إمي ابتسمت وقالتلي قلتلك رح يسعدك