الطيبون للطيبات والخبيثون للخبيثات

"طول عمري كنت بحلم بهاليوم الي رح أخطب الشب الي بحبه..
حبيته وأنا بصف عاشر، كان وقتها يكون مروح من الجامعة ويشوفني وعجبته..
صار كل يوم يوقفلي لما أروح ويحاول يحكي معي، كان مهندس وأنا مشانه صرت بدي أدرس هندسة..
 يوم ورا يوم صرت أحكي معه أكثر وبلشت أتعلق في وهيك ضلينا حب عالتلفون لوقت فتت الجامعة، كان اَخر سنة إله فيها..
طبعا فتت هندسة مثله لحتى أكون معه..
وكنت مبسوطة كثير، بحبه وبحبني ومرتاحة معه، صار الحكي بس يخلص جامعة يسافر سنة ويرجع يخطبني! وفعلا خلص جامعة، صح كان بهالسنة كثير مشاكل، بس كنا لسا بنحب بعض.. سافر ووقتها أنا صار يجيني عرسان كتير وأنا أرفض مشانه..
واحكيله متى رح تيجي تخطبني.. يحكيلي قربت... صاحباتي الي بعرفوا كانوا يحكولي إنه هالشب بضحك علي ومش مزبوط ومش لازم أوقف حياتي مشانه.. بس مع هيك ما سمعت كلامهم..
 وبعد سنة رجع وأول شي عمله إجى تقدملي، يومها كان أحلى يوم بحياتي، هيو صدق معي وإجا يخطبني، كنت طايرة فيه ومش مصدقة حالي، بس إمي مش مقتنعة فيه، تضل تحكيلي مش مرتاحتله، هالشب مش مزبوط.. وإحكيلها بعدين يا ماما هو بحبني وأنا بحبه وهينا خطبنا..
بالخطبة تغيرت معاملته معي، صار لما يجي عنا يحملني ألف جميلة ويقعد يعلق على أختي لإنه عندها إعاقة ويحكيلي أنا خايف أتزوجك وتيجيني بنت مثل أختك..
احكيله بس أختي بسبب الولادة صارت هيك مش وراثة، يحكيلي إيي عاد ويصير يتمسخر..
إمي كانت ست كبيرة بالعمر وطيبة كثير، كان لما تقعد تاكل معنا يصير يعلق إنها بتاكل بإيديها..
صار يعمل حركات كتير تستفزني، وأنا صرت أنخنق منه، غير هيك مرة كنت معه، اتصلت عليه بنت وجهه صار بالألوان وهو يحكي معها، حكتله مين هاي، قلي وحدة من الشغل، مرة كان معزوم عنا، ترك تلفونه عالطاولة وراح يغسل، وقتها إجاه مسج: شو روحت من عندها ولا لسا؟ اشتقتلك. أنا شفت المسج من هون وما ضل براسي عقل فتحت تلفونه وقرأت كل المسجات، كانت كلها مسجات حب وغرام بينه وبينها؛ كان بخوني معها..
صرت أعيط وانهرت وقلتله خلينا نفسخ الخطبة، طبعا هو انخزى وما عرف يحكي ولا كلمة، وبعد أسبوع فسخنا..
كنت كتير متدمرة فترتها، لساتني بحبه بس قرفانه منه! كل ما أتذكره قلبي يوجعني وأدعي عليه..

ومرت الأيام.. أنا كملت حياتي، وبعد سنة من لما فسخنا خطب 4 مرات وكل مرة كان يخطب شهر ويترك، كنت ادعي ربنا يبليه ببنت حرام مثله!
وتاخدلي حقي.. لفت الأيام وخطب بنت مش منبحة بالمرة كان يعرفها زمان، وقتها تأكدت من "الخبيثون للخبيثات" ارتحت ودعيت ربنا أشوف فيه يوم..
تزوج بعد فترة من هالبنت، كانوا دائما ينزلوا بوستات إنهم مبسوطين مع بعض ويسافروا..  بس كنت أحكي: معقول الي عملوا فيي ما يرجع فيه؟ لفت الأيام ودارت، جابوا ولد عنده تشوه خلقي؛ أنا ما شمتت فيهم..
بس صارت بعدها بينهم مشاكل كثيرة ومرته طلعت بتخونوا مع واحد ثاني وراح ما يقتلها..
أنا كنت قاعدة عالبلكونة لما شفت وسمعت هاالخبر، نزلت دمعتي وحكيت الحمد لله يا رب إنه خلصت منه زمان، وعنجد الخبيثون للخبيثات والطيبون للطيبات، زوجي ما في منه وبحبني وبحترمني كتير وعايشة معه كأني ملكة".

الكاتبة: هديل قاسم

*هذا النص لا يعبر بالضرورة عن رأي دوز