هديل قاسم

كانت عمتي كل ما تيجي عنا ، تصير تحكي لامي بكرا رح تخربي بنتك من هالدلال ! 
انا بناتي ما بسترجوا يرفعوا عينهم فيي ، ومستحيل وحدة فيهم تغلط ، او تحكي معي اشي ، امي تحكيلها انا بعرف شو مربية ، وبعامل بنتي مثل صديقتي ...

انا طبعا كنت اروح عند عمتي واشوف شو بتعمل مع بناتها، مانعة بناتها يطلعوا عند صاحبتهم ، وكل شي ممنوع ، وبنفس الوقت انا امي كانت معطيتني الحرية

حكتلي اعملي كل شي شايفتي صح ، بس قبل ما تعملي تعالي واسأليني ، امي ما علمتني اني رح انضرب اذا غلطت وحكتلها ، العكس كانت احيانا تعصب علي بس ترجع تحكيلي هاد غلط !|
وما بصير تتصرفي هيك مرة ثانية ، علمتني الفرق بين الحلال والحرام، علمتني اصلي من انا صغيرة حتى اتقرب من ربنا، وعلمتني انه الحجاب سترة وعفة للبنت بس ما غصبتني على شي...

بس كبرنا دخلنا انا وبنت عمتي الجامعة ، طبعا عمتي كانت عالطالعة والنازلة تسمع امي حكي اني انا بنتها المدلعة ، واني بكرا رح اجبلها فضيحة ، وخلي الصداقة تنفعك ، ولا واحد رح يفصل بنتك ، ورح تشوف كيف بناتها ما بسترجوا يغلطوا ، وكانت تعلمهم كيف يرقصوا بالاعراس، كيف يمسكوا عريس منيح، وتضل تحكي عنهم قدام الجارات انهم معدلات !

دخلنا الجامعة وبما انها بمدينة ثانية اخدنا سكن وشرطت عمتي انه انا اخد معهم لحتى اففسدلها شو بعملوا اول بأول ، بنفس الوقت حكتلهم مش تصيعوا مثلها ! ترا هاي البنت مش مربية منيح !

اول يوم بالسكن شميت ريحة دخان ، انا كنت قاعدة بالصالون ، كانت الريحة طالعة من غرفتنا وبس فتت لقيت بنت عمتي بتدخن وصارت تحلفني ما احكي لامها ... قلتلها يا حبيتبي الدخان بضرك ! بس ما سمعت كلامي

الاشي الي كان مزعجني جد ، انه هي ببلدهم لابسة جلباب لانها امها شيخة ومانعتها تلبس الا جلابيب ، وكانت تروح عالجامعة ببلايز وبلاطين معظم الايام ....

انا عكسها تماما ، كان معي الحرية البس شو ما بدي بس ما بتجاوز حدود ثقة اهلي الي معطيني ياها ، يعني مرة شتريت بلوزة كتير قصيرة سألت امي قبلها البسها وحكتلي لو بتطوليها شوي احسن ! فما طلعت فيها ...

بتذكر اخر فترة صارت بنت عمتي تتأخر بالليل؛ يومها سالتها ليش بتتأخري ...
صارت تحكيلي بكون عند صاحبتي .. 
يومها رنيت على امي حكتلها ماما بتضلها تتاخر برا اليبيت وعمتي لما تسالني بخاف احكيلها 
قالتلي انا علمتك تكذبي شي،
قلتلها بس بتعرفي عمتي بتعجب عليها!
حكتلي : جاوبيها انك ما بتعرفي وانا بتدخل بالموضوع 
......

يومها امي حكت لعمتي، عمتي انجن جنونها واجت عالسكن ثاني يوم تلم اغراض بنتها، وهي طالعة زورتني بنص عين وحكتلي ، اكيد انتي السبب انها هيك صارت تتأخر، انا بعرف ششو مربية ... مع هيك ضليت ساكتة احتراما لالها ! ومن يومها حاربتنا وبطلت تحكي معنا

لما صرنا سنة رابعة جامعة؛ انا كنت بحضر لمشروع تخرجي، اما اتصلت امي وحكتلي، مسكوا بنت عمتك بتحكي مع شب ؛ وطلعوها من الجامعة وضربوها .
...يومها انا جد زعلت عليها.... واتصلت على عمتي وحكتلها انتي السبب، تربايتك غلط، بنتك منيحة انتي خربتيها، مش كنتي تعلميها بالترهيب !
واجا وقت تخرجي، كنت فخورة كتير بحالي وباهلي، وفخورة اني كل هالايام الي قضيتها بعيدة عنهم كنت على قد المسؤولية وما وطيت راسهم ...

؛ روحت عالبيت، حضنت امي وحكتلها، شكرا لانك كنتي صديقتي دائما ، كنتي سندي؛ ما عمري فكرت اغلط ، وكل مرة كنت رح اغلط بشي كنت الجألك بدون ما اخاف، انا شخصيتي اليوم قوية ؛لانك امي، ولانه علمتيني عالدين والاخلاق والاحترام بالحب قبل ما تخوفيني فيي ....

ووراء كل بنت قد حالها وما بتغلط ام صديقة لالها بتردعها عن الغلط وبتوقف جنبها عكل شي صح ..

أمي ❤❤

**القصة خيالة وبنت عمتي بتجنن