"نيال كل وحدة حبيبها زلمة"

"كنت كل ما أشوف بنت خطبت من شب ما بتحبه ينقبض قلبي..
أنا بحب علي من 3 سنين وكل ما يتقدملي حدا كنت أرفض مشانه!
بس هو لليوم مو قادر يخطبني. كانوا عندي شلة صاحبات، كل ما يشوفوني يضحكوا ويحكولي ولك اتركك منه بكرا بصير عمرك 26 وبتعنسي، وإمه بتشوفله وحدة صغيرة!
أنا جد انقهر وأتضايق، واتصل علي وأعمل معه مشكلة وأصير أحكيله: يلا متى رح تخطبني؟
كان يحكيلي: اصبري رح تكوني مرتي والله غيري ما رح ياخدك..
علي: بس أنا تعبت! صرلنا 3 سنين وصرت رح أدخل بالـ26 وبتعرف كيف الكل بتطلع عالبنت إلي مو متزوجة بهالعمر، رح أكبر وأهلك يبطلوا يقبلوا فيي..
يضحك ويحكيلي رح تضلي طفلتي .. وجد صار عمرك 26!

أنا كنت أحبه كتير وأنا عارفة إنه كان يحبني، كثير مواقف بشعة تخطيناها مع بعض، كانت علاقتنا كلها مبنية عالاحترام والثقة..

بيوم من الأيام تقدملي شب وضعه كتير منيح كان قادر يفتح بيت.. أهلي صاروا يقنعوني وإجت صاحبتي لعندي عشان تقنعني أوافق..
قلتلها أنا بحبه!
حكتلي: الحب ما بطعمي خبز..
وقلتلها: وكيف رح تكون حياتي مع حدا ما بعرف شي عنه؟
صارت تحكي: اَخرتك بتعرفي.. يعني حبيبك شو بختلف عن هالشب..

صفنت ودمعت قلتلها: بتعرفي.. بختلف إنه هو معي من 3 سنين، لما أزعل بعرف شو إلي زعلني، لما أكون متضايقة وأضحك بعرف إنه هالموقف مضايقني، بعرف كل تفاصيل نفسيتي وتقلباتها، بعرف ليش أنا بكره الذرة مع إنها زاكية، ما في داعي أقعد أحكيله ساعة إنه الكرشات أكلتي المفضلة بس ما باكلها عشان مرة من أنا وصغيرة شفت أمي بتعملهم، بعدها بطلت اَكلهم ورجعت أكلتهم، ما بحتاج لشرح ساعات لحتى يفهمني ويفهم شو فيي ... 
وعارفة شو كمان، أنا بفهمه، بعرف إنه هالشي رح يعصبه، بعرف أكتر أكلة بحبها، كيف علاقته بالناس إلي حوالي، وبعرف إنه هو وأبوه دائما متمشكلين مع هيك أكتر حدا حنون عأهله..
صاحبتي حكت: يووووو خليكي غاطسة بهالأحلام الوردية بكرا بس يتركك أو تتزوجي حتى بتصحصحي! وطلعت..

بعد شهر ونص، أنا داخلة أقدم القهوة إجت عيني بعينه، ابتسمتله وابتسملي، نزلت دمعة من عيوني وتذكرت حبيبي، أهلي وأهله اتفقوا، كتب الكتاب بالتاريخ الفلاني، كتبنا الكتاب، كان في شغلات لسا بنكتشفها ببعض، وبليلة العرس كنت حاسة إني أسعد وحدة بالدنيا، كنت مبسوطة وبدي أطير من فرحتي، لإنه رغم كل شي صبرت ونلت وأخدت حبيبي..
اه تزوجت أنا وعلي، كنا خايفين يكون زواج فاشل لإنه أساسه الحب، كنا خايفين من كتير شغلات، بس كل هالشغلات تجاوزناها، صحيح كنا نختلف على كم شغلة، بس بكفي إنه ما بخليني أزعل اكتر من 10 دقايق، وبيجي عندي بحكيلي بحبك ووقتها أنا بنسى كل شي!
لإنه عارفه إنه حبنا كان كله بالحلال، ما عمرو تجاوز حدوده معي، كان دائما يخاف علي، صحيح في ناس حكولي الحب حرام، بس هاي مشاعر مش بإيدنا..
ونيال كل وحدة حبيبها زلمة..
ومش شرط إنه الزواج التقليدي فاشل..

أحلى شي بهالزواج إنه إحنا فاهمين بعض، بنضحي مشان بعض، وعارفين إنه هو اختيارنا ومش نصيبنا، خلينا نشوف الحب من زاوية المنيحة، الحب حلو بس الناس الي شوهت مفهومه، مش شرط الزواج عن حب يكون فاشل، يمكن هو قمة السعادة والنجاح بكفي النظرة الأولى إلي بطلعها عليكي عن مية كلمة وكلمة..".

الكاتبة: هديل قاسم

النص لا يعبر بالضرورة عن رأي دوز