"قتلها عمها لإنه سكران"..

"صرلي أنا وياها صحبة 8 سنين، ما بنفترق عن بعض، ولا توقعت يفرقنا أي شي. بيوم من الأيام ما صبحت علي، استغربت مش بعادتها ... 
رنيت عليها ما ردت، تلفونها مغلق قلت أكيد نايمة..
حطيت راسي ورجعت نمت، صحيت عالـ11 ولسا مش رانة علي، قمت غسلت وجهي وعملت فطور وفتحت الفيسبوك وفتحت بروفايلها لأبعتلها مسج!
لقيت وحدة منزلة الله يرحمك!

فكرت البنت بنتخوت، رنيت عليها تلفونها مغلق كمان مرة؛ اتصلت علي بيتهم برن برن وما حدا برد، وأختها كمان نفس الشي...
بلش بروفايلها يزيد التعزية؛ وكلمة الله ينتقم منه تزيد.. 
أنا بطلت قادرة أستوعب شو إلي بصير؟
مش عارفة أوصلها بأي طريقة، غير أروح عدارهم، لبست وطلعت لعندهم، كان بيتهم مليان حوالي شرطة، وصوت صراخ وعياط، أنا من المنظر خفت وصرت أعيط لا إرادي واركض ...

سمعت الجيران بحكو قتلها عمها كاين سكران!
ما قدرت أفوت وأشوف، بس وصلت البيت فتت عغرفتي وصرت أعيط بأعلى صوت، صرت أتذكر أنا وياها كيف كنا نحكي بدنا نسافر مع بعض وكيف لما نتزوج رح نروح عالصالون مع بعض...
ضليت 3 أيام ما أفتح الفيسبوك لإني مش قادرة أشوف الناس بحكو الله يرحمك إلها... وبعد الـ3 أيام إمها حكتلي أخد أختها الصغيرة معي لإنه نفسيتها تدمرت كتير... كان عمرها 14 سنة..
حذفت كل محادثاتي معها وكل شي ممكن يقهرني أكثر وخليت صورنا وبس..
بعد الـ3 أيام فتحته ويا ريتني ما فتحته!

أول صورة طلعت قدامي هي صورتها مقتولة، صار كل جسمي يرجف، غبشت الدنيا ومعدتي صارت تقلب، صار عندي ضيق نفس وبطلت عارفة أحكي..
يا ربييي ليششش ناشرين صورتها هيييك، أنا بدي تضل صورتها بضحكتها الحلوة.... 
صرت أقرأ التعليقات إشي الله يرحمها ..
إشي أبصر شو عاملة لقتلها... 
بلشت أنقهر أكتر، فتت بروفايلها لقيت بنات منزلات صور محادثتهم معها، ويكتبولها حكي ببكي أكثر!
صرت أعيط بأعلى صوت عندي، ما قدرت تحمل ، صورتها وهي مرمية عالأرض والدم مغطيها خلاني أتخيلها بكل مكان هيك، بكل الصور إلي هي معي صرت أشوفها هيك...

سمعت أختها بتصرخ، ركضت وحسيت شو صار، لقيتها حاملة الجوال وبتحكي أختي أختي انقتلت ما ماتت لإنها وقعت!
أنا ما عرفت شو أعمل، أخدت التلفون منها، الصور منتشرة بكل مكان الحكي بكل مكان ...
البنت انهارت وأخدوها عالمستشفى. مر شهرين على موت صاحبتي ولليوم مش قادرة أفتح الفيسبوك لإنه كل ما أفتحه بلاقي صورة لإلها وهي مقتولة حفي لساني وأنا أحكيلهم شيلوا الصورة، لا تنزلوا حكي هيك ببكي أهلها...

خواتها وأمها مش قادرين يحكو مع الناس، أختها الكبيرة بطلت تروح عالجامعة لإنه وين ما تروح بتشوف صور أختها مقتولة وبتشوف ناس بألفوا قصص!

وأختها الصغيرة لليوم حابسة حالها بغرفتها، ما بتحكي مع حدا وبتضل تصحى بالليل مرعوبة وتصرخ. الصورة كانت بشعة كتير! بشعة بقدر أنا لليوم كل ما أشوفها ببكي بحرقة وكأني اليوم خسرتها!

بس بتصير لما أي حدا ينقتل بطريقة بشعة بنصير ننقل وننشر صوره؛ طيب فكرتوا مرة بعيلته إيش رح يصير فيهم بكل مرة بشوفوا الصورة، فكرتوا بأهل الميت وصحابه لما يقرؤوا تعليقاتكم المستفزة، طيب لما تكتبوا عبروفايلتهم حكي ببكي الحجر فكرته لما تشوف أخته أو إمه هالحكي شو رح يصير فيها...

غطسنا بمشاعر إلكترونية ونسينا مشاعر الناس إلي برا هالفيسبوك!
أهل الميت، حتى حرمة الميت بطلنا نحترمها وصرنا ننشر صورهم.. يمكن متأثرين اَه، بس شو الفايدة غير إنكم بتشوهوا صورته عند أهله! وبتخلوهم يتعبوا أكثر! خلينا ما ننشر صور أي حدا ميت ونحترم حرمتهم ويا ريت لو توصل هالقصة لكتير ناس مش عارفين شو بعملوا لما ينشروا أو يكتبوا.. في ناس بتموت من كلمة.

الموت يوجع الأحياء".

الكاتبة: هديل قاسم

* هذا النص لا يعبر بالضرورة عن رأي دوز