قصة فتاة نابلسية مع مسابقة تحدي القراءة العربي

مع بداية أول أسبوع دوام في الصف الأول الثانوي ومع انتسابي لمدرسة جديدة، كنت متحمسة وسعيدة جدا وكان في هذه المدرسة مكتبة كبيرة.. واسعة ومليئة بالكتب الممتعة. 
فرحت كثيراً عندما رأيتها وصرت أذهب يوماً بعد يوم عند أمينة المكتبة لأستعير كتاباً وأعيد غيره. 
بعد مرور عدة أسابيع من المدرسة، قالت لي أمينة المكتبة إن هنالك مسابقة بعنوان "تحدي القراءة العربي" وهي مسابقة على مستوى الوطن العربي.
قالت لي: فكري بالأمر وقرري إن كنت تريدين المشاركة. 
طبعا، ولأنني أعشق القراءة، فرحت وقلت: نعم! 
كنت أدرس وأقرأ بشكل طبيعي كباقي الأيام التي كنت أقرأ فيها قبل المسابقة. تابعت المسابقة على الفيسبوك والانستغرام وقرأت شروطها شرطاً شرطاً.
كان أول شرط في المسابقة هو قراءة 50 كتاباً وتلخيصها. عملت على هذا الأساس قرأت وقمت بتلخيص ما قرأت وكتابته على دفتر خارجي.
وعندما بدأ موعد المسابقة، قالت لي أمينة المكتبة "شغلك غلط وما بزبط تكوني من البنات إللي رح يكملوا معانا بهاي المسابقة".
حاولت أن أشرح لها وتحدثت معها، لكن بلا فائدة. وجاء موعد تسليم الجوازات وقالت لي أنها لن تعطيني الجوازات لأن طريقة تلخيصي خاطئة .. 
قلت لها أعطيني الجوازات وبإذن الله ولن أخيب أملك.
تحديت نفسي وقلت "بدي أشارك بالمسابقة لإنو أنا عارفة إنو شغلي صح".
قمت بأخذ الجوازات ولخصت ما قرأت وجهزتها ليوم التسليم.
وفي هذا اليوم، ذهبت إلى مديرة المدرسة وحاولت شرح الأمرلها . لكنها لم تعجبها طريقة كلامي وقالت لي: "أنا ما بحب البنات اللي بجادلوا كتير وبحكوا كتير".
خرجت من مكتبها وأنا أحاول لملمة كرامتي.
ولم أيأس بعد. فتحت صفحة المسابقة على الفيسبوك وصورت الشروط، التي تدل على صحة كلامي. وتوجهت في اليوم التالي للمديرة وقلت لها: "خالتو بس بدي أورجيكي أكم صورة". وبعد أن نظرت إلى الصور قالتب لي: "بتعرفي أنا مش شغلي أقرأ تعليقات الناس عالفيس".
قلت لها: "خالتو بس هدول من صفحة مسابقة تحدي القراءة الرسمية" قالتلي "حتى لو".. سكتت ومشيت.
فكرت قليلا .. أنا قارئة خمسين كتاباً لكن ليس لدي الوقت لتلخيصهم. تعبت وأنا ألخص كل 100 صفحة كتاب. والمديرة قالت لي "شرط هاي المسابقة لو تقرئي كتاب من 1000 صفحة بضله كتاب واحد".
شككت بنفسي.. معقول أنا استيعابي بطيء لهذه الدرجة! 
طيب لو بعرف هيك كان عملت زي ما بقولوا من أول السنة بس هلأ ما معي غير أسبوع.. 
بعتت إيميل لموقع المسابقة، فهمتهم فيه كيف كانت طريقة تلخيصي.
يوم.. يومان وما في رد. قلت خلص فش أمل. 
بعد كم يوم.. لبست للذهاب إلى المدرسة، فتحت الإيميل لقيتهم بعثوا الرد.. انبسطت. فتحت عليه مكتوب فيه إنو كلامي صح وقالوا لي: شكرا لحسن تواصلكم.
رحت على مكتب المديرة منذ الصباح.. قلتلها "خالتو ما بدي أجادلك كتير بس بدي أورجيكي شغلة". 
فرجيتها الرسالة إللي بعتها للمسابقة، قالتلي طيب؟
بعدها ورجيتها الرد تبعهم.  
سكتت وانصدمت شوي.
ركت حالها على كرسي المكتب وقالتلي: "حلو الإرادة والإصرار إللي فيكي، بس إزا بتضلك هيك بحياتك بتتعبي". 
قلتلها مش مشكلة أنا بحب التعب مدامو هيك. 
سألتني شو مفكرة تدرسي؟ 
قلت لها يا هندسة يا صحافة.
إطلعت هيك بوجهي وقالتلي "بتلبقلك الصحافة". 
خرجت من مكتبها وأنا كتير مبسوطة، رحت عندها تاني يوم بقلها شو صار بالمسابقة؟ سمحولي أدخل؟
قالتلي اتصلت على وزارة التربية والتعليم وقالولي إنو حتى لو كلامك صح همة ما رح يقبلو فيه.. 
طيب والمسابقة إللي كانت زي حلم لإلي! 
أنا بعرف إني ما قرأت كتب كتير وبعترف إنو ثقافتي محدودة، طيب بس اسمحولي أجرب اختبروا ثقافتي بعديها ارفضوني!
خلوني أفشل وأتعلم من فشلي.. أنا بس بدي أجرب، حتى لو كانت احتمالية فوزي قليلة كتير حتى لو كانت احتمالية فوزي 1% بس خلوني أجرب.
هاي المسابقة كانت بالنسبة لي مثل مسابقة رياضيات لإنسان بشوف الرياضيات متعة حقيقية بحياته.. كانت بالنسبة لإلي زي مسابقة رسم لإنسان بشوف الرسم كل إشي بحياته!
خلونا نمارس طموحنا وآمالنا ونفشل.. حلو الفشل، ماله؟ مش أحسن من إنك ما تجرب تفشل؟ الفشل أفضل ألف مرة من عدم المحاولة، لإنو الفشل بالفعل هو محاولة وسعي لإدراك النجاح. تقبل مفهوم الفشل في الحياة من شأنه أن يريح أعصابك!
قد يكون لكل طالب شارك في مسابقة تحدي القراءة العربي قصة كهذه ليرويها في مستقبله أمام الملأ في لحظات نجاحه!
ولا تنس أن تردد كل صباح "وعلي أن أسعى وليس علي إدراك النجاح"
لكل إنسان طريقته في التعبير وأنا كانت هاي طريقتي.. بإني أعبر عن فرحي لمدرسة طلائع الأمل الثانوية للبنات وأقلهم ألف مبروك من كل قلبي.
بكفي إنها مثلت بلدي، ومثلت وزارة التربية والتعليم الفلسطينية!

الكاتبة: سجود النعنع

المحرر: عبد الرحمن عثمان
*هذا المقال لا يعبر بالضرورة عن وجهة نظر دوز