"حاسة إنه زوجي بخوني"

"صرلي فترة بشك بتصرفات زوجي، حاسة إنه بخوني، الزلمة فجأة صار يهتم فيي ويتغزل، وإمي حكتلي لما الزلمة يبلش يتغزل بمرته كتير يعني بخونها..
أنا بلش الفار يلعب بعبي، كل يوم يلبس طقم جديد، وعطره يوصل لآخر الحارة ريحته، وأناقة والسيارة يغسلها كل يوم... 
بس أنا صعب أروح وأتهمه أنه بخوني بدون دليل قاطع، فبلش كونان إلي جواتي يشتغل، أخليه يروح عالحمام وأمسك تلفونه وأبلش أفتش، طبعا ما كان شي يفتح غير شاشة القفل وكان في حرف w وقلب حب، أنا اسمي سارة وهو علي مين w هاي ... لازم ألاقيها!

أفوت على الفيسبوك تبعه، وأشوف اللايكات مين بتبلش بحرف w... يوم ويومين وثلاثة وما لقيت حدا بهالحرف، لوقت سمعته بحكي تلفون، اَه يا بيبي بعجبني شعرك الأحمر، وكيرلي بكون كثير حلو... أنا يومها ولعت معي بدي أفوت أنتفه وأنتف بيبته... بس اطلعت على شكلي بالمراي ولقيت شعري مش ممشط لونه أصفر باهت ومقصف، قلت طيب ما أروح أنا عالصالون وأصبغه أحمر وأقلع عيونه، فعلاً على طول قلتله بيبي هيك بمسخرة: أنا رايحة مشوار... 

دخلت الصالون وقلتلها بدي أحمر كيرلي، وطلعت شبه هيفاء وهبي، أول ما فتت البيت سمعته بصفر وبحكي واوو شو حلوة مرتي ..
وأنا أحكي بعقلي اَه طبعا ما هيك شبه بيبتك... 
وضل هيك أسبوع يهتم فيني ويدلعني ويحكيلي شو هالحلاوة، لسمعته كمان مرة بحكي: يا بيبي بحب اهتمامك بحالك، ما في لا كرش ولا زوائد، مثل الباربي، قعدت أتذكر أول ما عرفته؛ أنا كنت باربي فعلاً بس بعد أول ولادة طلعلي كرش وصرت ناصحة كتير، وأركنت إني تزوجت وخلص بطلت أهتم بحالي، بس قررت أرجع باربي، وأهتم بأكلي، وأعمل دايت، وهو كان بشجعني ويعمل دايت معي وهالشي الي خلاني أستغرب، وبعد 3 شهور فعلاً رجعت لوزني الطبيعي، وأول شي اشترالي فستان كان نفسي ألبسه بس من النصاحة ما قدرت أجيبه وهو عارف هالشي... انبسطت بس كمان لسا كرهانته لإنه بخوني ...

اَخر مرة سمعته بحكي عالتلفون: أحلى شي إنه ريحتك دايما عطر، ولا طبيخ ولا ريحة ولاد صغار، أنا وقتها خلص ولعت معي، رحت فتت عنده عالغرفة من ورا شوي شوي، ومسكت التلفون.. هو ضل ساكت ومكانه، وما عملش أي ردة فعل، أنا بلشت: "يا حيوانة يا خرابة البيوت، وأسب عليها، بس ما في صوت، شكلها قطعت المكالمة، اطلعت لقيت الجهاز عشاشة القفل وما في أي مكالمة، قلتله افتحلي الجهاز بعصبية، فتحه بكل هدوء.. اَخر مكالمة من 3 ساعات بيني وبينه! ما في مكالمة جديدة....
قلي ماشي رح اعترفلك ...

"أنا فعلا كنت أكلم بنت غيرك، بس هالبنت هي مرتي إلي حبيتها أول مرة، إلي كانت بتهتم بحالها وفيي، حسيت إنه بعد الزواج انشغلتي بالولد وفيي ونسيتي حالك، وأنا بعرف إنه الغيرة بتخلي الوحدة ترجع تهتم بحالها، وعملت حالي بحكي مع بنت غيرك لأخليكي ترجعي متل ما حبيتك مو مشاني بس ... مشانك إنتي ... قلتله: ولله كيد الرجال أعظم ... هالخطة ما بتخطر عبال إبليس..

بعد هداك اليوم، تغيرت شغلات كتيرة بحياتي، وبلشت أهتم بكل التفاصيل وما أركن إني تزوجت وخلص، لا الزلام بدهم اهتمام دائم وهو كمان صار يساعدني بشغل البيت، وكان مبسوط كتير فيي، وهو شايفني بهتم في وبالولد وبحالي ... صحيح في زلام عيونهم فارغة، بس إنتِ الأساس بهالقصة ، هو لو شو ما شاف بالاَخر رح يرجعلك، بس إنتِ لا تهملي بحالك وضلك أحلى وحدة بعيونه، هي شوية اهتمام بحالك وفيه ... وحياتكم بتصير أحلى".

كتابة هديل قاسم

* النص من خيال الكاتبة