"خسرت حياتي وسعادتي عشان فيديو عالفيسبوك"

بعد 5 سنين حب، ونحارب أهلنا لحتى يقبلوا يزوجونا لبعض؛ لأنه وضع خطيبي مش كثير؛ وأنا حالتي النفسية ساءت كمان، خطبنا!
مين كان يحكي إنه ممكن يجي يوم أخسر فيه سعادتي وحياتي بسبب فيديو انتشر عالفيسبوك! 
أول ما خطبنا، كانت الحياة بينا بتجنن، طايرة من فرحتي، شو بدي أحلى من هيك، بالخطبة ما عملنا حفلة، عائلية وبس ....
مرت سنة على خطبتنا، وبالآخر قررنا نتزوج، أنا طول هالسنة كان وضعي صعب.

إجا يوم العرس المنتظر، يا الله شو كنت مبسوطة، أخيرا رح ألبس البدلة البيضا، رحت عالصالون، تمكيجت عملت تسريحة، واستنيت أحمد إلي هو خطيبي ليجي ياخدني ... إجا عالوقت، كانت السيارة مزينة، قلي: طالعة بتجنني حياتي ... 
خجلت وقلتله عيونك ... 
وصلنا القاعة، لسوء حظي وإحنا داخلين، انكسر الكعب، حسيت بخلل توازن، بس ما بدي أخرب هالفرحة رح أحاول أمشي طبيعي لأوصل اللوج، بس ما قدرت صرت كل شوي بدي أوقع، الناس كانوا بضحكوا وأنا نحرجت كتير، اضطريت أشلح الحذاء وأمشي بدونه، كان فرق الطول واضح كمان، رجعوا يضحكو بصوت أعلى، أنا دمعتي نزلت بس أحمد مسكني وقلي تعالي تسأليش.

بعدها دبروها وجابولي حذاء ثاني، إجت رقصة السلو؛ قعدت أرقص أنا وياه، فجأة قلي مش نفسك أحملك؟
قلتله لا ولك ... 
قلي لا بدي أحملك ... 
حاول يحملني مرة ومرتين وثلاث وما زبط الوضع! الناس صارت تطلع وتضحك... بعرفش يمكن لإنه وزني زايد شوي .... حمدت ربنا إنه العرس مش مختلط وإني محجبة يعني ما في تصوير ...

روحنا على البيت، الساعة 1 بالليل بتصل حدا عأحمد بحكيلو مقاطع عرسكم عالفيسبوك؟
أحمد قله شو يزلمة بتمزح معي بنص هالليل؟
قله فوت وشوف الموقع الفلاني ...

أحمد طبعا توتر عالآخر .... 
فات شاف لاقى فيديو عليه ألفين لايك وألف كومنت ومليان شيرات ... وكله بتمسخروا عالعريس والعروس ....
بحلق بعيونه!
شاف الفيديو... قال اَه هاد أنا ... جيت أنا وقفت وراه أشوف، شفت الفيديو وقعت عالأرض!

صحيت لقيت حالي بالمستشفى، مقدرتش أتحمل حجم المسخرة إلي شفتها، أنا طول عمري الحجاب ما شلحته قدام شباب العيلة لألاقي حالي مسخرة وعالفيسبوك وبيوم عرسي! أحمد طبعا ما كان جنبي، كان بحاول يتواصل مع الموقع ليحذفوه، بس تواصل معهم، لاقى الفيديو بألف مكان، بطل يلحق، صرنا مسخرة العيلة، الكل يتصل يحكيلنا ولكم شو إلي صاير مين صوركم! وإحنا مش فاهمين إشي، عشنا أول أيام بزواجنا مشاكل ونكد، اللقمة ما نتهنى فيها، صرت أخاف أطلع من البيت ويشوفوني ...

كنت أفوت أشوف تعليقاتهم، بنات بعملوا منشن لصاحباتهم، بعملوا شير ويكتبو عروس مسخرة، إشي بسب علي لإني شوي وزني زيادة وما قدر يحملني أحمد، شفت تعليقات بتهد جبال ....

أحمد مقدرش يتحمل الوضع، قلي هالجيزة منحوسة، وهالشي إلي صار رسالة لنبعد عن بعض؟
بس أحمد أنا بحبك..
قلي صعب وين ما أروح بتمسخروا علي حتى بالشغل!
رحت عند دار أهلي وتطلقنا .....

عشت أيام الله بس بيعلم فيها؛ ويلي الناس من طلاقي ويلي من الفيديو إلي لسا بنتشر، حسيت إنها الدنيا سكرت بوجهي، وإنه لازم خلص أنتحر....

هالقصة خيالية اجتني بعد ما شفت فيديو لوحدة مش زابط يحملها عريسها وكيف الناس بتتداول الفيديو بطريقة مسخرة واستهزاء كان من الواضح إنه العرس مش مختلط وعالأغلب العروس محجبة! الفكرة مش بهاد الفيديو بس... الفكرة بمعظم الفيديوهات إلي بنتشروا .... وما حدا بعطينا الحق نقتحم خصوصية غيرنا.

صار في بنات ما بخافوا الله بروحوا على العرس وبصوروا مقاطع يورجوهم لصاحباتهم، وبعدها ينتشر عكل الفيسبوك ليجيب لايكات وكومنتات، والكل بصير يساهم بنشر هالفيديو! أو حتى يمكن بنت تصور مش هدفها الآذى بس ينتشر بكل مكان ...

جربتوا مرة تفكروا، إنه ممكن العروس والعريس يحطوا حالهم بهيك مواقف محرجة وفي غيرهم بصور ويسمحوا بهالشي ... طيب جربتوا تفهموا شعورهم، لو إنتو مكانهم شو رح تحسوا، إنه هالشي فعلياً ممكن يخرب حياتهم!

أنا بتمنى هالبوست ينتشر بكل مكان وتوصل الفكرة.. عارفين ليش؟ لإنه هاد واقع بنعيشه ويمكن أي حدا فيكم يكون ضحية تصوير مقطع صغير بعرسه المرة الجاي!".

كتابة: هديل قاسم

* النص من خيال الكاتبة