في بيت المسنين.. نسيت قلبي

ركيت إيدي على الطاولة إلي جنب تخته وبديت أسمعله، أول جملة حكالي إياها: "يا الله شو هالدنيا صغيرة يا عمو، بتذكر حالي وأنا قدك شو كنت أروح وأجي وأحب الحياة. شوفي هلأ أنا وين! أفنيت عمري وأنا اشتغل منشان أربي ولادي وشوفي ولادي وين حطوني، ولا واحد فيهم طلع فيه خير، فش غير محمد بيجي كل أسبوع بجبلي دخان".

وهو عمالو بحكيلي شو عملت في الحياة وشو إنها ظالمة وما إلها أمان، دخلت بهيجة وصارت تبربر كلام مش مفهوم وبعدين قالتله: "هو إنت كل ما بيجي حد يزورنا بدك تفتحله راسه بقصة ولادك إلي رموك وإنه محمد أحسن واحد وبجبلك دخان، محمد هاد لو أحسن واحد كان أخدك وقعدك عنده مش قلك تاخذنيش يابا مرتي ما بدها إياك. خلص تشكر فيهم. هي أنا ولادي كمان رموني عشان الورثة وما عمري قلت عنهم مناح وشكرت فيهم حسبي الله فيهم وين ما داروا وجوهم".

ضحكت الحجة إلي كانت قاعدة عطرف الطاولة نسيت اسمها، وقالتلها: "مش مبارح بالليل لسا قلتيلي إنه ولادك مناح بس وضعهم المادي ما بسمح إنهم يحطوكي عندهم، فجابوكي هون ورضيتي عليهم ونمتي ولي بهيجة".

هون أنا صفنت وما حكيت ولا كلمة لحتى دخلت الممرضة وقالتلي إنه خلصت الزيارة عشان موعد الغدا، سلمت عليهم ووعدتهم أرجع أنا وأصدقائي إلي كانوا معي وقلتلهم المرة الجاي بدنا نجيب معنا طبلة منشان تفرفشوا. انبسطوا كتير، وفي وحدة قالتلي تعالي كل جمعة تعالي.

وأنا طالعة فكرت، قلت شو هالظرف إلي بخلي ولاد يحطوا أهاليهم بهيك مكان؟ طيب همه كيف بهونلهم فيهم؟ ما بشتاقولهم؟ ما بحنولهم وما بحكوا هدول إلي كبرونا وتعبوا علينا؟ دعيت ربنا ألف مرة يطول بعمر أمي وأبوي وما يفرجيني فيهم يوم سوء.

كتابة: عرين عبد الله

تحرير: جلاء أبو عرب

* النص لا يعبر بالضرورة عن رأي دوز