صورت حبيبي يوم عرسه!

"عارفين أسوء شعور شو؟ تشوف الحلم إلي حلمته سنين وسنين مع حدا غيرك، أنا بنت عمري 25 سنة، بشتغل مصورة أفراح، الحياة كل مالها بتقسى علي أكثر .... 
كنت بحب شب، أنا بعرف إنه الحب من بدايته كان غلط، وما كان لازم أحبه وأتعلق فيه، بس شاءت الأقدار وحبيته وأنا عمري 24، كان أولها كتير منيح معي، بيخاف علي، بيهتم فيي، ويعطيني الحنان إلي حارميني أهلي منه، كنت مبسوطة كتير، وحاسة إني مش على هالأرض وطايرة من الفرحة، بيوم من الأيام تغير كل شي!

حبيته 5 شهور وما طلب لا يقعد معي ولا شي، كان حبنا بريء من بعيد وبس، ونهتم ببعض، طلب يومها يشوفني بكوفي شوب، حكيتله أنا صعب أطلع معك، أنا بخاف، وأهلي عقلهم بالمرة، غير إني معروفة ببلدنا لإني بصور بالأعراس، حكالي أنا بطلت أتحمل حب من بعيد إنتي حلالي ومتل مرتي! حكيتله بس إنت لسا ما طلبتني من أهلي..

ويوم ورا يوم طلباته تزيد وأنا أرفض، يوم يطلب مني أغير طريقة لبسي، يوم يحكيلي بحب البنت إلي بتأرجل، يوم يحكيلي بحب البنت إلي مو محجبة، بحب البنت الدلوعة، وأنا أحاول أغير بحالي مشانه، اَخر شي حكالي رح أتركك إذا ما جيتي تشوفيني، ضليت طول الليل أعيط، بالاَخر وافقت، طلعنا أنا ويا على كوفي شوب، أنا قعدت قباله عالطاولة، وضليت طول الوقت خجلانة ومش قادرة أطلع فيه، وهو يحكيلي مالك حبيبتي خجلانة! 

حطيت إيدي عالطاولة مد إيده، ارتعبت ... حكيت أنا شو بعمل هون .. ولله ما قدرت أضل قاعدة معه، طلعت ومن يومها صار كتير بارد بالتعامل معي، يحكيلي إني معقدة وما بزبط للحب، حكيتله بس أنا بحبك وصاينة حبي إلك، وبعملش إشي غلط وبحكيش مع شباب متل هالبنات.. صار يحكيلي إنتي ما بتوثقي فيي، إنتي أبصر مالك، حكتلو تعال اخطبني قلي ما بقدر، أنا ما معي أخطب .. وبالاَخر تركنا!

يا الله شو حسيت إني مكسورة، قلبي من جوا كان بوجعني، ألهيت حالي بالشغل، وضليت أصور بالأعراس، بيوم من الأيام بعد شهر من لما تركنا، دخلت على القاعة أصور، شفت خواته إجين، قلبي صار يدق، هالعرس لحدا بقربلهم كأنه، كانت صاحبتي جنبي، شوي شوي، إجا العريس، كان هو، أنا متأكدة إنه هو، لا شكلهم عيوني مغبشين، قعدت أدعي ربنا يطلع بشبهه، أطلع بحلم، بس مش عارفة شو هالقدر إلي خلاني أفوت وأصور عرسه، شفته ماسك إيدها، بطلع بعيونها، كان مبسوط كتير وهي مبسوطة، وأنا من ورا الكاميرا مثل الي بحضر جنازته!

تعمدت يشوفني، بس يشوفني واقفة عحيلي ومش واقعة، إجت فقرة تصويرهم صور عادية حكتلي صاحبتي حلا أنا بكمل عنك، حكتلها لا! طلعت مسكت الكاميرا، هنيتهم، هو انصدم، حس إني رح أخرب عرسه، صورتهم، ونزلت، روحت وانهرت، عارفين شو.. أكثر ليلة عيطت فيها بحياتي حسيت الدنيا سكرت قدامي، بدي أصير بنت مش منيحة، بلكي الحب زبط معي .... 

حبني شب تاني بس ما قدرت، صرت أبعد وما بدي أقرب من حدا أتقرب من ربنا أكتر، وأشتغل على موهبتي بالتصوير، بيوم من الأيام صورت صورة، هالصورة فازت بمعرض دولي، وأخدت مصاري عليها كتير، كنت مسميتها "الهروب من الشرنقة".. كيف الفراشة بتكون خايفة وهي جوا ومو عارفة جمالها، وبس تطلع منها قديشها بتطلع حلوة، كانت الصورة هيك.. بعد ما فزت بالجائزة، رحت بدي أخبر إمي بهالشي كنت مبسوطة كتير، قربت عندها وقلتلها يما إلي حبيته كسرني، ولي حبني كسرته، حكتلي ضلك قوية وإوعك تنكسري، حتلاقي واحد يحبك بالحلال ... ويتزوجك .. وتعيشي أحلى حياة معه .. 

بتتصل صاحبتي"الو حلا" سيما وسامر اطلقوا.... 
ليش! 
لقاها بتحب شب :)
سكتت سكتت وحكيت.... الدنيا كما تدين تدان... ومش بس هيك دوارة! وبتدور وبتدور وبتوجعك بأقرب الناس عليك... حمدت ربنا... وحكيت الله يعينها علي
جزء من هالقصة واقعية وصارت مع صديقة لإلي... وبناءً على طلبها نشرتها .. عارفين شو الحياة لحظة حب ولحظة كره ولحظة موت ... وبين الحب والموت شعرة! وما في حدا مثل زوجك! في واحد دق باب بيت أهلك .. طلبك من أهلك وصار زوجك غير هيك حكي فاضي :) شعرة ممكن تكسرك لاَخر عمرك .. أو تعطيكي حافز لتصيري أحسن وأحسن .. المهم تحبي "رجال" واعرفي إنه الرجال حيحبك بكل عيوبك".

كتابة: هديل قاسم