دكتور جامعة بده زوجة مش متعلمة!

"أول يوم بالجامعة كان متعب، خلصت دوام وقرفانة كل شي، وقفت باب الجامعة لأستنى تكسي، كانت أزمة كثير ولازم أحشر حالي خاوة بينهم لحتى يصحلي أركب، بس حاملة شنتة الهندسة بما إني سنفورة هندسة، ومسطرة الـT طالعة منها وخايفة تنكسر، وفوق هيك مشترية كتب للفصل، عرقي بنقط، ووجهي صار ألوان، وواقفة بتأفف ولو تنفخ بوجهي بعيط!

ضليت واقفة عجنب لخلصت الأزمة، وأجى تكسي وقفلي، طلعت معه، بس عطول شغل السيارة وضل ماشي، ما أخد ولا راكب غيري، وطول الطريق وهو يضحك وشوي يصفن. أنا متت من خوفي صار يجيني خيالات رايحة جاي، وأحكي أكيد رح يخطفني، مسكت الجوال ورنيت عأمي وقعدت أدردش معها بس خلصو المواضيع، وبطل في إشي أحكيه، والجامعة بعيدة عن البلد، قلي تخافيش مني عمي انتي بجيل بناتي!

أنا ضحكت وقلتله مش خايفة؟ بعدها صار يحكي، بتعرفي بنتي بعمرك، والسنة كانت توجيهي وجابت بالـ90، كنت حابب أدرسها بهالجامعة بسس الظروف ما سمحت! قلتله ووين بتدرس؟ قلي: لا ... إجا نصيبها وخطبت! كله من إمها مستعجلة عليها تقولي هم فوقها. أنا بطريقة عفوية رديت: بس حرام تزوجوها وهي شاطرة دخلوها جامعة....
شفت الدمعة والغصة بعيونه، حكى أنا طول عمري بشتغل وبشقى لأعلم هالبنت لإنه أخوها هامل وطلع من المدرسة، وكان أملي فيها، بس حليله يمرض لما أخته صارت توجيهي، ودفعنا كلشي لنعالجه!

قلتله: طيب خلي خطيبها يدرسها.... قال اااااخ بصوت مليان غصة، ولكك أخ، أنا شو طالع بإيدي، هو بدو ياها مش متعلمة!
_ ليش هو مش متعلم؟
ضحك وقال لا هو دكتور بالجامعة :) 
أنا فتحت تمي وحكيت بعقلي ولااااي لهون العرط يم دكتور وطالب وحدة مخلصة توجيهي وما بدو يعلمها ....

وصلت على البلد، زبط المراي واطلع فيي وحكالي عمي إوعك إوعك تتزوجي قبل ما توخدي شهادتك، وإن تزوجتي خلي يكملك تعليمك، ترا هاي سلاحك الوحيد؛ وديري بالك عحالك .... قلتله دير بالك عبنتك وتحرمهاش من التعليم، ضحك بوجهي وقلي الله كريم! مشيت لوصلت الكراجات وأنا افكر فيه، نفسي أعطيه رقمي وأخلي أبوي يعلم بنته، نفسي أعمله شي، صحيح نسيت أدفعله!

صرت ألاخم وأدور عليه.. سيارة من وراي بتزمر، اطلعت لقيته هو، أنا خجلانة منه بحكيله نسيت أدفعلك... قلي نسيتي الجزدان كله هون، خدي عمي، وانتبهي عأغراضك، يا الله شو إنه ابن حلال، شفت مرة كبيرة يدها تطلع معه، بتقله إنها ناسية جزدانها بالدار وبس توصل بتدفعله، قلها اطلعي وما عليكي!

بعد فترة بالجامعة صدفت وركبت معه، كان مبسوط ومكيف، بحكيله بتتذكرني عمي، قلي اه منسيتيكش من يومها بنتي دخلت جامعة. قلتله شو صار؟
قلي المرة إلي طلعت معي، خرفتها القصة وتبرعت تدرسها، منحة!
والدكتور 
قلي الله يخزي خليته يطلقها!
حسيت الفرحة بعيونه، الفخر، وكل شي حلو، نزلت من السيارة وبحكي صحيح ربنا ما بنسى حدا 
وما جزاء الإحسان إلا الإحسان".

كتابة: هديل قاسم