مبروك! انتي حامل

"حكالي الدكتور مبروك إنتي حامل....
بس الولد رح يكون مشوه، لأنه أنا وزوجي ولاد عم، وعيلتنا كلها ما بزوجوا إلا لقرايب ....
زوجي صار يحكي خلينا ننزل الولد، كيف بدو يعيش مشوه، بس أنا رفضت هالشي قلتله هاد روح وحرام أقتلها ....
خلال الـ9 شهور، بكل فحص كان الدكتور يحكيلي هالولد رح ينولد مشوه...نصيحة نزلي لأنه رح يغلبك كثير ... 
بس أنا كيف أتنازل عن قطعة من روحي، هاد ابني إلي كل ليلة بتخيله وبسمع صوته ....

إجا موعد ولادتي، دخلوني عملية قيصرية لأنه وضع الجنين الصحي مش كثير، وجع الطلق كان وجع لا يطاق، حسيت إني رح موت، عيطت وصرخت، بس لما خلص مفعول البنج وشفت ابني، كل هموم الدنيا راحوا، ابني كان عنده تشوهات خلقية، وتأخر عقلي، حكولي ما رح يكون طفل طبيعي، كانوا الناس بطلعوا علي بحسرة، وأنا فرحانة في قد الدنيا....

سميت ابني محمد، محمد كان صعب يرضع مثل الصغار لإنه عنده مشاكل بالبلع، كثير دكاترة حكولي ما رح يعيش أكثر من سنة لإنه إلي مثله ما بعيشوا كثير، واجهت صعوبات بتربايته، ونظرة المجتمع لإله، واجهت مشكلة بتعليمه، لأنه عنده مشاكل بالعقل، مع هيك ضليت أكافح وأناضل، وكنت دائما فخورة فيه، لما يحل مسالة رياضيات ولو بسيطة......

إجت أيام صعبة، احتجنا فيها لعمليات كثيرة لحتى يضل عايش كلهم كانوا يحكولي بترتاحي بس أنا كنت اعتبره قطعة من روحي وأضل أدعيله! لما صار عمره 18 سنة، صار وضعه صعب أكثر وصار الوعي عنده يقل، بس إلي بحبه في، إنه بين الكل بميزني، بيضحك بوجهي، ومثل الولد الصغير بريء كثير ...

جارتنا إلي كانت تضل تسمعني حكي إنه ابني عالة وغلطة إني جبته ابنها مسكو بقضية مخدرات، وسجنوه، وبعدها لما طلع من السجن، مرحبا ما بحكي معها. صحيح ابني مريض بس ما بئذي حدا ..... وحنون كثير..

المجتمع شايف محمد عالة علي، وأنا شايفة المجتمع عالة على محمد... وأنا فخورة بابني كثير، ورح ضل قدمله لاَخر لحظة بحياتي! ولا تنسوا غربوا النكاح ... لإنه زواج الأقارب بعمل مشاكل..

الأم ما في إنسان مثلها، ما في حدا بقدر يضحي مثلها، هي الي بتحب ولادها لو شو ما كانوا، الي بتتحمل مرضكم وتأففكم، الي بتحارب لحتى تصيروا إشي مهم بهالدنيا، الأم نعمة حافظوا عليها وإياكم تزعلوها لو شو ما صار...

هيدي إمي بتعتل همي".

كتابة: هديل قاسم

* القصة من خيال الكاتبة