ما بدي أتزوج!

"طول عمري بخاف من الزواج والولادة، ما بدي أتزوج ... 
وما بدي أحمل وأولد وأموت بالعملية ويتربى ابني يتيم!
كانوا عقدة بحياتي، لأنه جارتنا ماتت وهي تولد ابنها، وزوجها اتزوج عليها بعد بـ 3 شهور بس ....

صرت أحكي براسي ولله ما رح أتزوج لوقت تعرفت على شب بشتغل معي، بيوم سيء كثير، نقلوه لعندي عالغرفة، أنا بوجهي وحمة دائما بحاول أخبيها لإني ما بحبها ، فبقضيها أحط مكياج لأخفيها، يومها كنت مستعجلة وطلعت عأساس ما حدا بشتغل بنفس الغرفة معي والتقيت في ..
إجا اطلع في وسألني لي بتبكي؟ ولي بتحاولي تغطي وجهك ....
قلتله : لا ... بس وجهي مش كتير مرتاح ...
قلي تسمحيلي انتي لو شو ما كنتي لا تخجلي من حالك، كل واحد فينا في شي بحب يخبي مثلا أنا عندي شامة، من أنا وصغير بكرهها لما كبرت صرت أشوفها إشي حلو، وصار يضحك فيي، تلقائياً أنا شلت إيدي عن وجهي، وهو أكيد شاف الوحمة بس ما علق عالموضوع وضل يحكي عادي ويضحكني ..

حسيته اعطاني ثقة كبيرة بنفسي، روحت يومها بدون ما أغطي وجهي، وصرت كل يوم والثاني أتعلق فيه أكثر، وما انتبه للوحمة كثير، العكس كان يضل يطلع فيي ويحكيلي هاي أحلى شي بوجهك أحلى من عيونك؟ مع إنهم عيوني حلوين .....

لوقت إجا وقلي بدي أطلبك من اهلك، أنا غير الوحمة عندي عقدة من الزواج، بس هاد غير مستحيل يكون مثلهم، بعد تفكير وافقت، ما رح أحكي عن فترة الخطوبة لأنها مع واحد مثله إشي بجنن ، ولما تزوجنا، مرقت سنة عزواجنا وما بدي أحمل ...

هو حس إنه أنا عندي عقدة من اللموضوع، صار يحكيلي مش مهم الولاد خلص، بس إنتي تضلي بخير، بس أشوف كيف لهفته عالصغار وكيف بطلع عليهم، حملت، طول فترة الحمل وهو يدعمني نفسياً، يقدر عصبيتي، يتحملني لما أعيط بدون سبب، إجا موعد الولادة، أنا صرت أعيط وأحكيلو إذا متت سامحني، لا تتزوج غيري، بس هو أصر يفوت معي عالولادة، مسك بإيدي طول الوقت، صحيح كنت بتوجع وميتة بس هو دعمني كثير وسمعت صوت ابنا ونمت، صحيت لقيته جنبي، قلتله شو صار ....
ضحك وقلي يمرتي المجنونة إنتي متتي وأنا متت وهسا إحنا بالقبر ... 
صرنا نضحك وكل المستشفى إنلمت عضحكتنا ....

تتزوجيش إلا إلي يكون سند إلك، إلي يعطييكي ثقة بحالك وشكلك وعيوبك، يتقبلك كيف ما كنتي بعيداً عن تصنعك، يوقف معك بكل المواقف يعاتبك إذا غلطانة ويحضنك بعدها، اتزوجي إلي حنيته هي أول صفاته، لا غني ولا فقير ولا كبير ولا حلو، اتزوجي الي بحبك إنتي مش إشي ثاني".

كتابة: هديل قاسم