أهل العروس وأهل العريس في 2020

"حوار جلسة التعارف الأولى بين أهل العريس وأهل العروس 2020 أهل العروس: والله بنتنا هاي المدَللة حتى اسمها عالفيس بوك دلوعة أبوها. أهل العريس: ماشاء الله!! والله ابننا مرضي، الله يرضى عليه جنب اسمه عالفيس بوك كاتب"رضاكِ يا أمي". أهل العروس: بنتنا بنت عز شوفو صورها عالانستغرام كل يوم بلبسة شكل. أهل العريس: والله ابننا طول وقته أنيق ومهفهف شوفو صوره عالفيس بوك بتعرفوا. أهل العروس: والله بنتنا مابتحب إلا الغالي والماركات العالمية مافيها إلا بتعمل لايك لصفحات هالماركات. أهل العريس: ابننا الحامي يحماه ما بموت إلا بالسيارات الألماني حتى بالأمارية صورة الكفر تاعته جنطات BMW آخر اشي نزل عالسوق. أهل العروس: ماشاء الله ماشاء الله والله بنتنا ست بيت معتبرة وصور طبخاتها عالفيس بوك بتشهد. أهل العريس: ابننا محبوب كل يوم بنعزم على جاهه شكل وصوره معبية الصفحات. أهل العروس: بنتنا محبوبة بشكل رهيب حسابها عالفيس بوك سَكّر عالـ 5000 صديق. أهل العريس: ابننا محترم كتير مابنزل عالفيس بوك إلا احاديث وآيات قرآن وكلام موزون. أهل العروس: بنتنا قمه في الأدب دايما جنب اسمها عالفيس بوك "شعاري بالحياه القناعة" بينما زميلتها كاتبة "رافعه حاجبها ومو عاجبها" والله التربايه بتفرق يا جماعة!! أهل العروس: بنتنا حوتة دراسة كل صورها عالفيس بوك صورة كتاب وإيدها عليه وبتكتب. أهل العريس: ابننا معظم ألبوماته صور إله بالمحاضرة وهو مش منتبه عالتصوير، ومركز مع الأستاذ. وينتهي الحوار بقراءة الفاتحة وتعلو الزغاريد. وتغيير صورة بروفايل العرسان بصوره لإيد العريس ماسك إيد العروس ولابسين دِبل وأُضفر العروس عليه مناكير وحبة ستراس".   كتابة: عبلة رويس

• هذا المقال لا يعبر بالضرورة عن رأي دوز