عمال السوق الشرقي يناشدون بلدية نابلس

"إحنا بنشتغل في المجمع الشرقي بمدينة نابلس، وكانت البلدية مخصصة مكان لحاوية نفايات بعد هدم وتزبيط المكان وصار مكان صحي ونظيف. واليوم طلعوا بقرار جديد إنه يتم تخصيص مكان جديد للحاوية مع بوابة لكن بجانبنا داخل السوق الشرقي.

اللي بنعرفه إنه حد من البلدية شافها وما عجبه مكانها والمنظر قاموا دخلوها عنا جوا السوق. طيب اللي مرق وشافها ما عجبته فما بالك إحنا اللي عندها ليل ونهار شو نحكي؟ إحنا باب رزقنا مكتوب في هالمنطقة وربنا كاتبلنا الرزق هون وإحنا بنبيع في هذا المكان ومن هاي المنطقة بتعيش أكثر من عيلة.

إحنا اللي بنطلبه بس يحطوها بالمكان تاعها مش يشيلوها، مع إنه المكان تاعها ضرر علينا لكن بضل أهون شوي من إنها تضل داخل السوق الشرقي، بدل الوحدة جابوا 2 وبعيد عنكم مناظر تقشعر لها الأبدان من شوالات الجاج واللحم والزبالة والفطايس. إشي بقرف ما بتحمله أي إنسان وكل هاي أمراض. وشكرآ على جهودكم الطيبة ما خلينا حد إلا وحكينا معه لكن ما في تجاوب".